प्रेस स्वतन्त्रताको सम्मान गर

प्रत्येक वर्ष ३ मईलाई अन्तर्राष्ट्रिय प्रेस स्वतन्त्रता दिवसका रूपमा मनाउने गरिएको छ। प्रेस स्वतन्त्रता दिवस आउन केही दिन बाकी रहँदा रूपन्देहीमा क्रियाशील सञ्चारकर्मी माथि अवैध कारोबारी (तस्करी) गर्दै आएका समुहले आक्रमण प्रयास गरेका छन् ।सो घटनाको पत्रकार सम्बद्ध संघसस्था, राष्ट्रिय मानव अधिकार आयोग लगायत बिभिन्न सङ्घसंस्थाले भत्र्सना गर्दै दोषी उपर कडा कारबाहीको माग गरेका छन् ।

घटना अनुसार वैशाख ८ गते सोमबार भैरहवाबाट सङ्घीय सरकारका कृषिमन्त्री रामनाथ अधिकारी सहभागी हुने कार्यक्रमको समाचार सङ्कलनका लागि मर्चवार जाने क्रममा मायादेवी गाउँपालिका स्थित मकरीमा लुम्बिनी प्रेस क्लबका सदस्य एवं एपीवान टिभीको लुम्बिनी प्रदेश प्रमुख पत्रकार राधेश्याम विश्वकर्मामाथि आफूलाई दीपेश यादव बताउने तस्करहरूको समूहले घेरा हाली दुव्र्यवहारसँगै भौतिक आक्रमणको प्रयास गरेको थियो ।

समाचार सङ्कलन गर्न जाने क्रममा भैरहवा–मर्चवार सडकको मूल खण्डमा खुलेयाम लाइन लागेर विभिन्न सवारीमा भइरहेको तस्करीको दृश्य देखेपछि पत्रकार विश्वकर्माले भिडियो खिच्ने क्रममा तस्करहरूको समूहले आक्रमण प्रयास गरेको थियो ।

दीपेश यादव नेतृत्वको सात–आठ जना तस्करहरूको समूहले पत्रकार विश्वकर्माको झोला खानतलासी गर्नुका साथै क्यामेरा, मिडिया हाउसको परिचयपत्र र मोटरसाइकलको चाबी खोसी केही समय घेरा हाली बन्धक बनाएका थिए । त्यस्तै पत्रकार विश्वकर्माले तस्करी भइरहेको दृश्य क्यामेरामा कैद गरेकोमा प्रहरी अगाडि जबरजस्ती उक्त भिडियो उक्त समूहले डिलिट गराएका थिए ।

केही समय बन्धक बनाएपछि भिडियो डिलिट गराएर तस्करहरूले क्यामेरा, परिचयपत्र र मोटरसाइकलको चाबी खोसी केही समय घेरा हालेर बन्धक बनाएका थिए । केही समय बन्धक बनाएपछि भिडियो डिलिट गराएर तस्करहरूले क्यामेरा र परिचयपत्र फिर्ता गरेका थिए । तस्करहरूले क्यामेरा खोस्ने क्रममा पत्रकार विश्वकर्माको क्यामेरा समेत टुटफुट भएको थियो ।

उता आक्रमणको प्रयास गर्ने यादवलाई प्रहरीले नियन्त्रणमा लिएर पनि फरार गराएको भन्ने आरोप रुपन्देही प्रहरी माथि लागेको छ । लुम्बिनी प्रेस क्लव, पत्रकार महासङ्घ रूपन्देही लगायतका सङ्घसंस्थाले रूपन्देहीका प्रमुख जिल्ला अधिकारी बासुदेव घिमिरेलाई ज्ञापन पत्र बुझाउदै दोषीलाई पक्राउ गरी कडा भन्दा कडा कारबाहीको माग गरेका छन् । उनीहरूले पत्रकारलाई स्वतन्त्रतापूर्वक लेख्न दिने वातावरण सृजना गर्न प्रशासन माग समेत गरेका छन् ।

पछिल्ला समय सञ्चारकर्मी माथि यस्ता घटना दोहोरिन थाल्दा पत्रकार आतङ्कित भएका छन्। उनीहरूले प्रेस स्वतन्त्रताको सम्मान गर्न सबैमा आग्रह गर्दै आएका छन् । स्वतन्त्रता र पत्रकारितालाई सुरक्षित राख्न सकेको खण्डमा मात्र द्वन्द्व समाधान र शान्तिपूर्ण लोकतान्त्रिक प्रक्रियामा प्रेसले जिम्मेवारी निर्वाह गर्न सक्छ।
(न्यूज ओके साप्ताहिकको २०८२ बैशाख११ गते बिहीबारको अंकमा प्रकाशित सम्पादकीय)