बुद्ध र यती एयरको भैरहवा –पोखरा उडानमा ‘प्राइस वार’

मनोरञ्जन शर्मा

भैरहवा – गौतमबुद्ध अन्तर्राष्ट्रिय विमानस्थल भैरहवाबाट अन्तर्राष्ट्रिय उडान सञ्चालन भए सँगै आन्तरिक क्षेत्रिय उडानले पनि गति लिन थालेको छ । निजी बायु सेवा कम्पनी बुद्ध एयरले नियमित भैरहवा –पोखरा एक उडान गर्दै आएकोमा शनिवार देखि २ उडान सुरु गरेको थियो ।
सोमबार सम्म न्यूनतम ३ हजार ५ सय र अधिकतम ५ हजार रुपैयाँ सम्म एक तर्फ हवाई भाडा रहेकोमा मङ्गलबार देखि लागू हुने गरी एकतर्फी हवाइ भाडा दर २ हजार पाच सय रुपैयाँ कायम गरेको छ ।

अर्को प्रतिस्पर्धी हवाईसेवा कम्पनी यती एयरले पनि मङ्गलबार देखि भैरहवा पोखरा हवाई उडान सुरु गर्ने गरी २ हजार ५ सय रुपैयाँ मुल्य हवाई भाडा कायम गरे पछि बुद्ध एयरले पनि बाध्य भएर हवाई भाडा कटौती गरेको हो ।
हवाई भाडा घटाएर दुबै विमानसेवा कम्पनी बिच प्राइस् वार सुरु भएको देखिन्छ । नियमित उडान गरिरहेको बुद्ध एयरको एकाधिकार यतीले प्राइसवार गरी तोडिदिएको छ । बाध्य भएर बुद्ध एयरले हवाई भाडा घटाउनु पर्यो । हवाइ भाडा घट्दा यात्रुलाई त फाइदा भएको छ तर दिगो हुने होकी होइन भन्ने प्रश्न उठेको छ ।

बुद्ध एअरका सेल्स डाइरेक्टर रूपेश जोशीले यसलाई प्राइसवार भन्न नमिल्ने बताउँछन् । डिमान्ड र सप्लाईको कुरा आउँछ, हामीले एकबाट दुई उडान सुरु गरयौ, एक उडानमा दुबै तर्फ शतप्रतिशत अकुपेन्सी थियो र दोश्रो उडानमा पनि राम्रै यात्रु पाइएको छ । हामीले यात्रु डाइभर्ट हुन्छन भनेर भाडा घटाएका होइनौ, २५ सय रुपैयाँ सबैभन्दा तल्लो फेयर राखेका हौ, तल्लो फेयर हुँदा सम्म २५ सयमा पाइन्छ सकिए पछि माथिल्लो फेयर यात्रुले लिनु पर्छ, जोशीले भने। भैरहवा पोखराको हवाई भाडा अब २५ सय रुपैयाँबाट सुरु रहेको बुझनु पर्यौ, उनले भने । दिगो हवाई भाडा र उडानको कुरा गर्दा उनले विगत ११ वर्ष भन्दा लामो समय देखि बुद्धले भैरहवा पोखरा नियमित उडान गरिरहेको बताउँदै भने, दुई बाट उडान १ होला तर उडान निरन्तर भैरहनेछ ।

यती एअरका भैरहवा स्टेसन प्रमुख अनुप ढकालले मङ्गलबार देखि भैरहवा पोखरा दैनिक उडान सञ्चालन गर्न लागेको र अहिलेलाई भाडा दर २५ सय रुपैयाँ फिक्स राखिएको बताए । दशैँ अघि देखिनै उडान सुरु गर्ने भनिएपनि अहिले यात्रुको माग र चाहना अनुसार उडान सुरु गर्न लागेको र यो उडान निरन्तर हुने बताए । हामीले उडान र हवाई भाडा सार्वजनिक गरेपछि यात्रुहरू खुसी भएका छन् । हामीले सस्तो भाडा गर्ने बित्तिकै अरुले बाध्य भएर हवाई भाडा घटाएको र यात्रुलाई फाइदा पुगेको ढकालको भनाई छ ।

बुद्ध एअरका बरिष्ठ प्रबन्धक एवं भैरहवा स्टेसन प्रमुख दर्शन घिमिरेले भैरहवा पोखरा उडान निरन्तर भैरहने र हवाई भाडा मुख्य बस्तु नभएको बताए । मुख्य कुरा नियमित उडान हुनु हो, त्यो हामीले प्रदान गरीरहेका छौ, घिमिरेले भने । प्रारम्भमा बिच क्राप्ट जहाजबाट हप्ताको एक दिन पछि दुई दिन गर्दै जादा यात्रुको माग बमोजिम एटिआर ४२ बाट सेवा सुरु भएकोमा अहिले एटिआर ७२ बाट दैनिक दुई उडान सेवा दिईरहेको घिमिरेले बताए ।

लोकप्रियताका लागी यात्रुको ध्यान आकृष्ट गर्न केही समयलाई सस्तोमा उडाई फेरी पछी हवाई भाडा बढाउने काम हुन नहुने पर्यटन व्यवसायीको भनाई छ । अहिले प्राइस् वार गर्ने पछि मिलेर भाडा बढाई नीतिगत रुपमा यात्रु ठग्ने काम गर्न नहुने नेपाल एशोसियसन अफ ट्राभल एण्ड टुर एजेन्टस लुम्बिनी प्रदेशका बरिष्ठ उपाध्यक्ष चन्द्र थापाले बताए । बुद्ध एयरले भैरहवाबाट ७।४० बजे बिहान र बेलुकी ६।४० बजे र यती एयरले बिहान ११।०५ बजे उडान गर्नेछन् । यस अघि पनि यती, गुण, सिम्रिक र सांग्रिला एयरले पनि भैरहवा पोखरा उडान सुरु गरेपनि निरन्तरता दिन सकेका थिएनन् ।