राजस्व लक्ष्य पछ्याउदै भैरहवा भन्सार तथा आन्तरिक राजस्व कार्यालय

मनोरञ्जन शर्मा

भैरहवा– विगतका ३ वर्षमा राजस्व सङ्कलनमा विभागले निर्देशन गरे अनुसार लक्ष्य पुरा गर्न असफल भएको भैरहवा भन्सार कार्यालय तथा आन्तरिक राजस्व कार्यालय भैरहवाले चालु वर्षको ९ महिनामा लक्ष्य अनुसार राजस्व सङ्कलन गर्न नसके पनि विगतका वर्षहरूमा भन्दा राजस्व सङ्कलन राम्रो रहेको छ । दुबै कार्यालयको मासिक राजस्व सङ्कलन ८० प्रतिशत भन्दा माथि रहेको छ ।

विगत केही वर्षमा वार्षिक मात्र होइन मासिक राजस्व सङ्कलन लक्ष्य समेत पुरा गर्न नसकेका कार्यालयले चालु आर्थिक वर्षको पहिलो ९ महिनामा विभाग द्धारा तोकिए अनुसारको राजस्व सङ्कलन गर्न नसके पनि उल्लेखनीय रुपमा राजस्व सङ्कलन भएको कार्यालय प्रमुखहरूले बताएका छन् ।

भैरहवा भन्सार कार्यालयले अहिले मासिक लक्ष्यको ८५ दशमलब २ प्रतिशतका दरले राजस्व सङ्कलन गरिरहेको कार्यालय प्रमुख एवं मुख्य भन्सार अधिकृत राम प्रसाद रेग्मीले बताए । असोज महिनामा लक्ष्य अनुसार राजस्व सङ्कलन गर्न सफल भयौ अन्य महिनाको राजस्व सङ्कलन पनि ८३ प्रतिशत भन्दा माथि छ र ९ महिनासम्ममा औसतमा ८५ दशमलब २ प्रतिशतले मासिक राजस्व सङ्कलन भएको छ, मुख्य भन्सार अधिकृत शर्माले भने ।

आन्तरिक नियन्त्रण प्रणालीमा सुधार, चोरी पैठारी नियन्त्रण एवं अवैध व्यापारमा निगरानी, स्वदेशमा निकासी मूलक उद्योगहरू सञ्चालन हुँदा बजार र अर्थतन्त्र चलायमान, मोटरसाईकल, कारहरूको पैठारीमा बृद्धी, चुस्त भन्सार प्रशासन लगायत कारणले भन्सार बाट हुने आयात निर्यात एवं राजस्व सङ्कलन प्रभावकारी ढङ्गले भएकोले राजस्व संकलन राम्रो हुदै गएको हो, मुख्य भन्सार अधिकृत रेग्मीले बताए । रेग्मीका अनुसार भैरहवा भन्सार कार्यालयले गत वर्षको ९ महिनाको तुलनामा १६ दशमलब १९ प्रतिशत राजस्व सङ्कलन वृद्धि भएको बताए ।

भैरहवा भन्सार कार्यालयको तथ्याङ्क अनुसार गत वर्षको ९ महिनाको तुलनामा चालु वर्षको ९ महिनामा आयात तथा निर्यात व्यापार दुबै वृद्धि भएको छ । चालु वर्षको ९ महिनामा १ खर्ब ९१ अर्ब ६१ करोड ९५ लाख ५८ हजार रुपैयाँ मूल्य बराबरका बिभिन्न सामान आयात भएको छ । गत वर्ष यसै अवधिमा १ खर्ब ७७ अर्ब ६४ करोड रुपैयाँ मूल्य बराबरको सामान आयात भएको थियो ।

तुलनात्मक रुपमा गत वर्षको तुलनामा यस वर्षको ९ महिनामा आयात व्यापार ७ दशमलब ८७ प्रतिशतले वृद्धि भएको हो । त्यसै गरी निर्यात व्यापार गत वर्षको तुलनामा ३९ दशमलब ५ प्रतिशतले वृद्धि भएको रेग्मीले बताए ।

गत वर्ष यही अवधिमा १० अर्ब २३ करोडको निर्यात हुँदा चालु वर्षको समीक्षा अवधिमा १४ अर्ब २२ करोड रुपैयाँ बराबरको बिभिन्न सामानहरू भारत तथा तेश्रो मुलुक निर्यात भएको छ । यस नाका हुँदै चालु वर्षको ९ महिनामा सबै प्रकारका मोटरसाइकल ११ अर्ब ७८ करोड ४८ हजार रुपैयाँ बराबरको १ लाख १ हजार २९ गोटा आयात हुँदा १२ अर्ब १६ करोड ८० लाख ६९ हजार रुपैयाँ राजस्व आएको छ । त्यसै गरी इन्धनबाट चल्ने जीपकार र भ्यानहरू २ हजार ३ सय ४८ गोटा २ अर्ब ७५ करोड ८३ लाख ३२ हजार रुपैयाँ बराबरको आयात हुँदा ७ अर्ब २७ करोड १९ लाख ६९ हजार रुपैयाँ राजस्व उठेको छ । त्यस्तै पेट्रोल, विद्युतबाट सञ्चालित जीपकार भ्यान, शुद्ध फलाम(स्पोन्ज,फ्रेस आइरन) डबल क्याब पिकअप गाडी, मोबाइल टेलिफोन, चकलेट, एम.एस विलेट, एलपिग्यास जस्ता बढी राजस्व दिने वस्तुहरूको आयात बढेको छ ।

उता निर्यात व्यापार ह्वात्तै वृद्धि भएको छ । भटमासको प्रशोधित तेल, सेन्थेटिक यार्न, सिमेन्ट खैरो, खयरकत्था, पिना, स्टिल फलामको भाँडाकुँडा, चाउचाउ, नुडल्स पास्ता, खोटो, रोजीन, सुर्यमुखिको प्रशोधित तेल, प्लाइउड जस्ता बस्तुहरू निर्यातमा सबैभन्दा अघि छन् ।

आन्तरिक राजस्व कार्यालय भैरहवाले पनि लक्ष्य अनुसार राजस्व सङ्कलन नगरे पनि विगतका वर्षहरूमा भन्दा प्रभावकारी ढङ्गले राजस्व सङ्कलन भैरहेको जनाएको छ । कार्यालय प्रमुख एवं प्रमुख कर अधिकृत प्रेमराज पोख्रेलका अनुसार चालु आर्थिक वर्षको साउन महिनामा लक्ष्य अनुसार सङ्कलन गर्न नसकेता पनि भदौ,असोज र फागुन महिनामा राजस्व संकलनको लक्ष्य पुरा भएको छ, कार्तिक, मंसिर, पुस, माघ र चैत्रमा पनि लक्ष्य अनुसार प्रगति नभए पनि राम्रो सङ्कलन भएको छ ।

कार्यालयले चालु आर्थिक वर्षको ९ महीनामा साउन देखि चैत्र सम्म गत वर्षको सोही अवधिको तुलनामा १ अर्ब ३२ करोड रुपैयाँ बढी राजस्व सङ्कलन गरेको छ । गत वर्षको तुलनामा यो वर्षको ८ महिनामा उक्त रकम १८.३ प्रतिशतले बढी आन्तरिक राजस्व कार्यालय भैरहवाका प्रमुख कर अधिकृत पोख्रेलले भने । कार्यालयले चालु वर्षको ९ महिनामा ८ अर्व ४७ करोड ६८ लाख ५५ हजार रुपैयाँ राजस्व सङ्कलन गरेको छ ।

अर्थतन्त्रका सूचकहरूमा देखिएको सुधार, आर्थिक गतिबिधीमा बृद्धी, नियमित, प्रभावकारी र क्षेत्रगत बजार अनुगमन, बक्यौता असुलीमा तिव्रता, कर परीक्षण तथा अनुसन्धानको प्रभावकारीता, परीणाममुखी करदाता शिक्षा, नक्कली मूल्य अभिवृद्धि कर बिजक जारी गर्नेहरू माथिको अनुसन्धान जस्ता कारणले राजस्व सङ्कलन गत वर्षको भन्दा सुधारमुखी भई बढी हुन पुगेको प्रमुख कर अधिकृत पोख्रेलले बताए । गत वर्ष समीक्षा अवधिमा ७ अर्ब १६ करोड ७९ लाख ६८ हजार सङ्कलन गरेको थियो । कार्यालयले अहिले मासिक औसतमा ९० दशमलव ६ प्रतिशतका दरले राजस्व सङ्कलन गरिरहेको छ , पोख्रेलले जनाए ।

यो कार्यालयलाई राजस्व विभागले आर्थिक वर्ष २०८१।८२को ८ ९ महिनामा कुल ९ अर्ब ३५ करोड १६ लाख ४९ हजार रुपैयाँ असुलीको लक्ष्य दिएको थियो । कार्यालयको वार्षिक राजस्व लक्ष्य भने १३ अर्ब २७ करोड हो र ९ महिनामा वार्षिक लक्ष्यको ६४ प्रतिशत राजस्व सङ्कलन भएको छ , पोखरेलले भने, अब बाकी अन्तिम त्रैमासिकमा लक्ष्य अनुसार सङ्कलन हुने अपेक्षा कार्यालयको छ, उनले भने । आन्तरिक राजस्व कार्यालय भैरहवाको कार्यक्षेत्र रूपन्देही जिल्लाको सिद्धार्थनगर नगरपालिका, तिलोत्तमा नगरपालिकाको वडा नं ५ देखि १७ सम्म, देवदह नगरपालिकाको वडा नं. १,२,३,४, ११ र १२, लुम्बिनी सांस्कृतिक नगरपालिका, गैडहवा गाउँपालिका, कोटहीमाई गाउँपालिका, मर्चवारी गाउँपालिका, मायादेवी गाउँपालिका, ओमसतिया गाउँपालिका, रोहिणी गाउँपालिका, सम्मरीमाई गाउँपालिका, सियारी गाउँपालिका रहेका छन्।

(न्यूज ओके साप्ताहिकको २०८२ बैशाख११ गते बिहीबारको अंकमा प्रकाशित समाचार)