टुगा आस्था विकास सहकारीको भैरहवामा सेवा केन्द्र

श्रीन्यूज ओके रिपोर्टर
भैरहवा ।

रुपन्देहीको ओमसतिया गाउँपालिका–१, कटैयामा केन्द्रीय कार्यालय रहेको टुगा आस्था विकास बचत तथा ऋण सहकारी संस्था लिमिटेडले भैरहवामा सेवा केन्द्र विस्तार गरेको छ । भैरहवामा सहकारीको सेवा केन्द्र चौथो हो । यस अघि तिलोत्तमाको कोटीहवा, ओमसतियाको ठुटीपीपल, सियारीका सेवा केन्द्र सञ्चालनमा आइसकेका छन् ।

भैरहवा सेवा केन्द्रको सञ्चालन पछि यस क्षेत्रका सर्वसाधारणले यो सहकारी मार्फत गुणस्तरीय सेवा प्राप्त गर्ने संस्थाका अध्यक्ष डीबी थापाले बताए । यसक्षेत्रका समुदायस्तरमा रहेका सानासाना पूँजिहरुलाई सङ्कलन गरी समुदायमै आवश्यकता अनुसार बिभिन्न शिर्षकमा लगानी गर्ने अध्यक्ष थापाले बताए । सहकारीको सिद्धान्त, भावना, नीति अनुसरण गर्दै अघि बढे कहिले अप्ठ्याराे नपरीने थापाले जनाए ।

संस्थाले भैरहवा सेवा केन्द्रबाट पनि केन्द्रीय कार्यालयबाट उपलब्ध हुने सबै खाले सेवा सुबिधाहरु उपलब्ध गराउने संस्थाका मुख्य प्रबन्धक लक्ष्मण थापाले बताए । सहकारीमा सदस्यहरुका लागि ५ लाखको दुर्घटना बीमा सुबिधा, ऋण बीमा, निःशुल्क रगत सुविधा, समवेदना राहत सुविधा, स्वास्थ्य सेवामा विशेष छुट, सुत्केरी भेटघाट तथा नव दम्पति स्वागत कार्यक्रम, ज्येष्ठ नागरिक सदस्य सम्मान, बाल बचतकर्ता सम्मान लगायतका सामाजिक कार्य रहेका छन् भने बालदेखि बृद्धसम्मका लागि मासिक बचत, पर्व बचत, बालहित बचत, उद्यमी बचत, खुत्रुके बचत, नारी बचत, सरल बचत,प्रौढ बचत, दैनिक बचत, रेमिट बचत, मुद्धती बचत कार्यक्रम रहेको र ऋण सेवामा कृषि ऋण, उद्योग, व्यापार ऋण, कल लोन, रोजगार ऋण, हायर पर्चेज (उत्पादन क्षेत्र) हायर पर्चेज (अनुत्पादक क्षेत्र), शिक्षा ऋण, घर जग्गा ऋण, स्वास्थ्य उपचार ऋण, सामाजिक ऋण, कर्मचारी ऋण सहितको कार्यक्रम सञ्चालनमा रहेको थापाले बताए ।

सहकारीको भैरहवा सेवा केन्द्र सिद्धार्थनगर नगरपालिका वडा नम्बर ८ (कुमारी बैंक पछाडी भाई मार्केट परिसर) मा रहेको छ । सेवा केन्द्रको शुभारम्भ गर्दै सिद्धार्थनगर नगरपालिकाका प्रमुख इश्तियाक अहमद खानले आफूले धेरै पहिला देखिनै यो सहकारीको विषयमा सुन्दै आएको बताउँदै राम्रो गर्ने सहकारीलाई सम्मान, प्रोत्साहन तथा नराम्रो गर्नेलाई कारबाही गरिने बताए । प्रमुख खानले ससाना र निम्न वर्गीय सर्वसाधरणको पूँजी संकलन गर्ने र उनिहरुमै लगानी गर्ने संस्था सहकारीहरु कानूनको अधिनमा रहेर संचालन हुनुपर्नेमा जोड दिए ।
खानले टुगा सहकारीको अहिलेसम्मको अवस्था राम्रो र प्रभावकारी भएको जनाउँदै आगामी दिनमा पनि सोही अनुसार अघि बढ्न आग्रह गरे ।

कार्यक्रममा विशिष्ट अतिथि राष्ट्रिय सहकारी महासंघका संचालक एवं जिल्ला सहकारी संघका अध्यक्ष भीमप्रसाद तुलाचन, जिल्ला बचत तथा सहकारी संघ, रुपन्देहीका अध्यक्ष प्रकाश भट्टराई, पूर्व सहकारी निरीक्षक चन्द्रकान्त भट्टराई, सिद्धार्थनगर सहकारी शाखा प्रमखु कमलकान्त खनाल, लुम्बिनी प्रेस क्लबका अध्यक्ष नरेश केसी, सहकारीका शेयर सदस्य मनोरंजन शर्माले अहिले सहकारीका लागि विषम परिस्थिति आएकाले सहकारीको शेयरसदस्य बन्दा संस्थाको बारेमा राम्ररी जानकारी लिएर संस्थाको बारेमा बुझेर मात्र सदस्यता लिने साथै आफूले राम्ररी चिनेको सहकारीमा मात्र गर्नु पर्ने र आकर्षक ब्याजको लोभमा नपर्न उनीहरुले आग्रह गरे ।

बाहिर अन्यत्रबाट आएका सहकारीले बदमासी गर्दा राम्रो काम गरिरहेका सहकारीलाई समेत अप्ठ्यारो परेको उनिहरुको भनाई थियो । सेवा शुभारम्भ कार्यक्रम संस्थाका उपाध्यक्ष परसुराम पोखरेलले स्वागत मन्तब्य राखेका थिए । अध्यक्ष डीबी थापाको सभापतित्वमा भएको कार्यक्रमको सञ्चालन सचिव गोकुल पोखरेलले गरेका थिए ।

पहिलेको टुगा सहकारी, आस्थाश्री सहकारी र देउनारी विकास सहकारी २०७६ असोज २६ गते एकिकरण भई टुगा आस्था विकास बचत तथा ऋण सहकारी संस्था बनेको हो ।

तस्बीरः बिशन गुरुङ