श्रीन्यूज ओके रिपोर्टर।भैरहवा
रुपन्देहीमा यो वर्ष ५१हजार ५सय किलो सयपत्री फूल उत्पादन भएको छ । माग बढ्दै जान थालेपछि ४।३० हेक्टर क्षेत्रमा व्यावसायिक सयपत्री खेती गरिएको कारण उक्त फूल उत्पादन भएको हो । केही वर्ष अघिसम्म भारतीय सयपत्री फूलमा निर्भर हुनु पर्ने रुपन्देही अहिले जिल्लामै उत्पादन हुने सयपत्री फूलमा आत्मनिर्भर भएको छ ।
अपुग फूलहरू छिमेकी जिल्लाबाट आयात हुने गरेको छ । लुम्बिनी प्रदेश कृषि निर्देशनालयका अनुसार यस वर्ष समग्र लुम्बिनी प्रदेशको २५।७२ हेक्टर क्षेत्रफलमा व्यावसायिक सयपत्री खेती भएको छ । रुपन्देहीको तिलोत्तमा, सैनामैना, सियारीलगायतका क्षेत्रमा व्यावसायिक सयपत्री फूलको खेती भइरहेको छ । विगत केही वर्षअघि सम्म पुरुषहरूले मात्रै गर्दै आएको सयपत्री फूलको खेतीमा अहिले रूपन्देहीका महिलाहरू पुरुषभन्दा बढी छन् ।
रूपन्देहीको धेरै स्थानीय महिलाहरूले सामूहिक कृषि फार्म दर्ता गरी यो व्यवसायलाई व्यावसायिक रूपमा अघि बढाउँदै आएका छन् । तिलोत्तमा–४, डिंगरनगरमा रहेको क्षितिज नमुना कृषक समुहकी अध्यक्ष नवीना भण्डारीले यस पटक फूल प्रतिकेजी ५ सय रुपैयाँ र माला प्रति गोटा १ सय रुपैयाँदेखि १५० सम्ममा बिक्री भएको बताइन् । लुम्बिनी प्रदेश कृषि निर्देशनालयका अनुसार रुपन्देही बाहेक लुम्बिनी प्रदेशका अन्य जिल्लाहरू दाङमा ६।३८ हेक्टर क्षेत्रफलमा सयपत्री खेती गरिएको छ ।
कपिलवस्तुमा ६ हेक्टर, गुल्मीमा २।७८ हेक्टर, पाल्पामा १।८८ हेक्टरमा व्यावसायिक सयपत्री खेती गरिएको छ । बर्दियामा १।२५ हेक्टर, अर्घाखाँचीमा ०।८५ हेक्टर, रुकुम पूर्वमा ०।५ हेक्टर क्षेत्रफलमा सयपत्री फूलको व्यावसायिक खेती गरिएको हो । रोल्पामा ०।१८, बाँकेमा १।०७, प्यूठानमा ०।४० हेक्टरमा सयपत्री खेती गरिएको निर्देशनालयकी बागवानी विकास अधिकृत सुनैना बराइलले बताइन् । प्रदेशका अन्य जिल्लाका तुलनामा सयपत्री फूलको व्यावसायिक खेतीका लागि दाङ प्रदेशकै अग्रणी जिल्ला बनेको छ ।
कृषि निर्देशनालयका अनुसार यस वर्ष प्रदेशमा तीन लाख ८ हजार ५ सय किलो सयपत्री फूल उत्पादन भएको छ । उत्पादनसँगै सयपत्रीको खपत राम्रो देखिएको छ । गत वर्ष बजार अभाव भएकोमा यस वर्ष फूल राम्रो बिक्री भएको हो । कार्यालयका अनुसार तीन लाख ८ हजार ५ सय किलो सयपत्रीको मूल्य १२ करोड ३४ लाख रुपैयाँभन्दा बढी भएको अनुमान गरिएको छ । उत्पादित सयपत्री फूल मुलुकमै खपत भएको बराइलले बताइन् । प्रदेशमा यो वर्ष २५।७२ हेक्टर क्षेत्रफलमा व्यावसायिक सयपत्री खेती र करिब १० कट्ठा क्षेत्रफलमा मखमली खेती भएको छ ।
Get real time update about this post categories directly on your device, subscribe now.
