पञ्चकन्या समूहको ५०औं वार्षिकोत्सवमा वृहत दन्त शिविर आयोजना

• भैरहवा ।

प्रतिष्ठित औद्योगिक समूह पञ्चकन्याले स्थापनाको ५० वर्ष पुगेको अवसरमा मुख्य उद्योग परिसर रुपन्देहीको कोटीहवामा दन्त शिविर आयोजना गरेको छ । उद्योगमा काम गर्ने कामदार, कर्मचारी उनिहरुका परिवार र उनिहरु बस्ने स्थान वरपरकालाई लक्षित गरी निःशुल्क रुपमा दन्त शिविर आयोजना भएको पञ्चकन्या समूहका नायव महाप्रबन्धक देबेन्द्र शाहुले बताए । ‘‘कर्मचारी कामदारहरुलाई अरु बेला बाहिर गएर परीक्षण गर्न समय नहुने भएकाले पनि उनिहरुको मुख स्वास्थ्यलाई लक्षित गर्दै उद्योग परिसरमै दन्त शिविर सञ्चालन गरेका हौ ।’’ शाहुले भने । सोमवारबाट सुरु शिविर बिहीवारसम्म सञ्चालन हुनेछ ।

उद्योग परिसरमा सोमवार बिहान तिलोत्तमा नगर पालिका वडा नम्बर १५ का वडा अध्यक्ष खेमराज गुरुङको दाँत परीक्षणसंगै शिविरको सुरुवात भएको थियो । कर्मचारी, कामदार, उनका परिवार र अन्यका गरी १ हजार २ सय जना भन्दा बढीको दन्त परीक्षण र उपचार हुने बताइएको छ । उपचारमा अप्ठ्यारो भएकाहरुलाई अन्यत्र लगेर पनि उपचार गर्न मद्धत गर्ने समूहले जनाएको छ । दन्त शिविरमा सहयात्री नेपालले प्राविधिक सहयोग उपलब्ध गराएको छ । २ विदेशी चिकित्सक सहित नेपाली दन्त चिकित्सकको समूह रहेको छ ।

पञ्चकन्या समूहले स्थापनाकाल देखिनै प्रत्येक वर्ष सामाजिक उत्तरदायित्व अन्तरगत बिभिन्न रचनात्मक काम गर्दै आएको छ । समूहका अध्यक्ष प्रेमबहादुर श्रेष्ठले २०२९ सालमा पूर्वी नेपालको इलाममा पञ्चकन्या राइस मिल स्थापनाबाट यस समूहको सुरुवात गरेका थिए । त्यसपछि २०३८ सालमा रूपन्देहीको कोटिहवामा पञ्चकन्या प्लास्टिक पाइप उद्योग स्थापना गरिएसंगै २०३९ सालमा आइरन, २०४६ सालमा पीभीसी पाइप उद्योग, २०५४ सालमा फलामे छड उद्योग, २०६३ सालमा सीपीभीसी पाइप र २०७१ सालमा स्टेनलेस स्टिल ट्याङ्की उद्योग सञ्चालन सफलता पूर्वक गरेको छ भने भैरहवा विशेष आर्थिक क्षेत्र सेजमा पनि उद्योग रहेको नायब महाप्रबन्धक शाहूले बताए ।

तिलोत्तमा –१५, का वडाध्यक्ष गुरुङले वर्षाैदेखि उद्योगले आसपासका बस्तीमा सामाजिक योगदान पुर्याउँदै आएको जनाउँदै ५० वर्ष पूरा गरेकोमा शुभकामना दिदै यसपाली दाँत जस्तो संवेदनशील अंगको उपचार हुन लागेकोमा खुशी व्यक्त गरे ।प्रतिनिधि दीपेश घिमिरेले मुलुककै ठूलो मध्येको पञ्चकन्या समूहसित आवद्ध हुन पाउँदा खुशी लागेको बताए । शिविरका लागि आफ्नो संस्थाबाट १३ जनाको समूह आएको जानकारी गराए । ‘‘शिविरमा काउन्सिलिङका साथै दाँत परीक्षण, दाँत निकाल्ने, सफा गर्ने र भर्ने काम गरिने छ ।’’ उनले भने, त्यसबाहेक जटिल समस्या भएका बिरामीलाई क्लिनिकमा लगेर उपचार गराइने छ । त्यसक्रममा बिरामीलाई छुटको व्यवस्था हुनेछ ।’

पञ्चकन्या समूहका वरिष्ठ इन्जिनियर मिलन थापाले उद्योग सञ्चालनको ५०औं वर्ष पुगेको अवसरमा आयोजित शिविरबाट धेरै भन्दा धेरैले लाभ हासिल गर्ने बताए ।