भ्वाइस अफ भैरहवाको उपाधि आभाषलाई

मनोरञ्जन शर्मा
भैरहवा।

१५ वर्षिय आभाष काफ्लेले भ्वाइस अफ भैरहवाको उपाधि जितेका छन् । सिद्धार्थ उद्योग वाणिज्य संघले आयोजना गरेको भ्वाइस अफ भैरहवामा अन्तिम २१ प्रतिष्पर्धिलाई पछि पार्दै काफ्लेले गायन प्रतिभा कार्यक्रमको सिजन फोरको उपाधि जितेका हुन् ।

साई ग्लोबल एकेडमी भैरहवामा कक्षा १० मा अध्ययन गर्दै आएका काफ्लेको गायन तथा सङ्गीत क्षेत्रमा लगाव भएको ४ वर्ष पुगेको छ । छोटो समयमै उनले गायनमा निखार ल्याउँदै पहिलो प्रयासमा भ्वाइस अफ भैरहवाको उपाधि जित्न सके ।

यस अघि मैले न त यस्ता कार्यक्रममा भाग लिएका थिए, न त कतै अन्य बाहिर साङ्गीतिक कार्यक्रममा सहभागी भए, तर घरमै गित गुनगुनाउँथे, गाउँथे नियमित रियाज गर्थे । उपाधि जितेपछि प्रतिकृया दिँदै श्रीन्यूज ओकेलाई काफ्लेले भने ।

गायन क्षेत्रमा आकर्षण र लगाव बढ्दै जाँदा भैरहवा कला केन्द्रमा भर्ना भई गुरु किशोर बिके (इन्द्र) सँग सङ्गीत नियमित रुपमा सिक्दै आए । इन्द्र गुरुको कला केन्द्रमा विद्यार्थीको रुपमा गए पछि धेरै मद्दत भयो, गित सङ्गीत बुझ्ने, पढ्ने, अभ्यास गर्ने अवसर पाए, उपाधि जिते पछि इन्द्र गुरुलाई गुरु दक्षिणा नै यो उपाधि दिए जस्तो भयो, हर्षित मुद्रामा गायक काफ्लेले भने ।

छोराले सानै उमेरमा भ्वाइस अफ भैरहवाको उपाधि जितेपछि घरपरिवारका सबै सदस्यहरु खुशी छन् । पढाईसंगै गायन क्षेत्रमा पनि रुचि रहेको देखे पछि उनका बुवा राकेश काफ्ले (खडानन्द) ले जहिले पनि प्रोत्साहन गरे । ‘‘छोराको रुचि देखे पछि मैले कहिल्यै अवरोध गरिँन, पढाईसंगै आफ्नो रुचि भएको क्षेत्रलाई अघि बढाउनु पर्छ भन्दै हौश्याई रहे ।’’ काफ्लेका बुवा राकेशले भने ।

छोराको रुचि संगित तर्फ ढल्केको देखेपछि आमा सरस्वती काफ्ले भने निराश भएकी थिइन् । ‘‘भैरहवा आइडलमा सहभागी हुनु अघि गित सङ्गीतमा लागेर कतै पढाई बिगार्ने त होइन छोराले जस्तो लाग्थ्यो र गाली गर्थे, अब एसईई परीक्षा आउँदैछ, परीक्षा बिग्रन्छ, गित सङ्गीतमा भन्दा पढाईमा ध्यान दिनु पर्छ भनेर गालि गरिरहन्थे ।’’ आमा सरस्वतीले भनिन् । गालि गर्दा पनि भागेर जान्थ्यो संगित सिक्न । अहिले खुसी लागेको छ, हर्षित छौ हामी, उन्ले भनिन् ।

प्रतियोगितामा भाग लिएको पनि थाहा थिएन । छनौट कार्यक्रममा उत्कृष्ट २१ भित्र परेपछि बल्ल थाहा पाए, त्यसपछि बल्ल उसमा प्रतिभा रहेछ भन्ने लाग्यो र सबैले हौश्यायाैँ र अन्तत विजयी पनि भयो । ‘‘अब पढाई नबिगारीकन पढाई र सङ्गीत एक साथ अघि बढाओस् भन्ने चाहना हो ।’’ आमाले भनिन् । हाम्रो छोरा राष्ट्रिय कलाकार बनोस् भन्ने चाहना छ ।
काफ्ले उपाधि जितेसंगै परिवारका सदस्य, विद्यालय परिवार, शुभेच्छुक सबै खुशी भएका छन् । ‘‘हाम्रो विद्यालयले एक राम्रो प्रतिभा बाहिर ल्याएको छ, आज हामी हर्षित छाैं ।’’ साई ग्लोबल एकेडमीका प्रबन्ध निर्देशक मोति पौडेलले भने । ‘‘पढाईमा पनि ओके छ, गायनमा पनि ओके निस्कियो ।’’ पौडेलले भने । काफ्लेका दाई आकाश काफ्ले पनि भाईले उपाधि जित्दा निकै खुशी छन् । एमबीएमा अध्ययन गर्दै आएका आकाश भाईले पढाईसंगै गायन क्षेत्रलाई अघि बढाउन परिवारको पुरै सहयोग, साथ रहने बताए ।

भ्वाइस अफ भैरहवा उपाधि घोषणा हुँदा उपस्थित रहेका काफ्लेका आफन्तहरु ठूलोबाबा मोहन, ठूलीआमा बिन्दु, राधा काफ्ले, भरत काफ्ले, देव शर्मा लगायतका परिवारका सदस्यहरुमा खुशी र हर्षको सीमा थिएन ।

सिद्धार्थनगर नगर पालिका वडा नम्बर ७ मन्जरीपथमा स्थायी घर भएका काफ्लेको मन पर्ने गायक राजेश पायल राई हुन् । सेमिक्लासिक, पप, सुगम सङ्गीत मनपराउने काफ्लेलाई अजित सिंहको गायन पनि औधि मन पर्छ । भ्वाइस अफ भैरहवाको अन्तिम क्षणमा उनले मन पर्ने गायक राजेश पायलको ‘नमाग म सँग’ भन्ने गित गाएका थिए । प्रतिभासँगै दर्शकको भोटिङ्गको आधार (पपुलर भोट) मा उनि उपाधि बिजेता भएका हुन् । काफ्लेले सानै उमेरमा आफ्नो लुकेको प्रतिभालाई बाहिर ल्याउन सफल भएको र उज्ज्वल भविष्य रहेको सङ्गीत गुरु किशोर बि.के. बताउँछन् ।

भ्वाइस अफ भैरहवा सिजन फोर उपाधि बिजेता काफ्लेले नगद २५ हजार रुपैयाँसंगै, एउटा गित रेकर्डसंगै सो गितको भिडियो छायांकन, कवेरा कलेक्शनबाट गिफ्ट , आगन्तुक रिसोर्टमा निःशुल्क बसाई साथै धेरै उपहार पाएका छन्  सिद्धार्थ उद्योग वाणिज्य संघले गायनमा रुचि भएकाहरुको प्रतिभा प्रष्फुटन गर्ने उद्धेश्य राख्दै २०६९ सालदेखि आफूले आयोजना गर्दै आएको लुम्बिनी राष्ट्रिय महोत्सवबाट भ्वाइस अफ भैरहवा गायन प्रतियोगिता सुरु गर्दै आएको संघका अध्यक्ष भिष्म न्यौपानेले बताए ।