रुपन्देही प्रहरीको चाडपर्व लक्षित सुरक्षा योजना : गलत कृयाकलाप भएको देखे तुरुन्तै १००मा फोन गर्नुहोस ।

  भैरहवा

दशैं,तिहार र छठ पर्वलाई लक्षित गर्दै रुपन्देही प्रहरीले सुरक्षा योजना बनाएको छ । शान्ति सुरक्षाको प्रत्याभुति गर्दै आम सर्वसाधारणले ढुक्क पुर्वक चाडपर्व मनाउन पाउन भन्ने उद्धेश्य सहित बनाईएको सुरक्षा योजना आईतवार जिल्ला प्रहरी कार्यालयले पत्रकार सम्मेलन गरी सार्वजनिक गरेको हो ।
पत्रकार सम्मेलनमा रुपन्देही प्रहरी प्रमुख एवं प्रहरी उपरीक्षक रवीन्द्र रेग्मीले चाडपर्वको समयमा अपराधिक क्रियाकलापहरु चोरी–तस्करी, लुटपाट, जबरजस्ती चन्दा संकलन, झै–झगडा हुनसक्ने भन्दै यस्तालाई निस्तेज पार्न विशेष सुरक्षा योजना बनाइएको बताउदै ‘परदेशबाट आ–आफ्नो घर फर्कने क्रममा सीमा क्षेत्रमा ठगिने, लुटपाट हुने, हैरानी खेप्नुपर्ने, सवारी दुर्घटना, पर्वकै मौकामा चोरी–तस्करी हुने र अवैध हातहतियार एवं लागूऔषध ओसारपसार गर्ने काम हुनसक्ने भएकाले यस्ता कार्य रोक्न प्रहरी सक्षम रहेको र चौबीसैं घण्टा आमनागरिकलाई सुरक्षा दिन लागेको बताए ।

अबैध तथा संकास्पद गतिबिधीहरु तपाईहरुको वरपर भए तुरुन्तै १००मा फोन गरीहाल्नुस, हामी एक्सनमा आउनेछौ,प्रहरी उपरीक्षक रेग्मीले भने । गलत काम गर्ने जो कोही पनि कानुनी दायरामा आई कारबाहीमा पर्छन्, उन्ले भने । 

पर्वको मौकामा पटका पड्काउने, आतिसबाजी गर्ने, विभिन्न समूहले देउसीभैलो तथा अन्य सांस्कृतिक कार्यक्रमहरुको नाममा गैरक्रियाकलाप गर्ने लगायतका गतिविधि हुनसक्ने भएकाले त्यस्ता क्रियाकलापलाई नियन्त्रण एवं न्युनीकरण गरी जिल्लाको शान्ति सुरक्षाको स्थितिलाई मजबुत राख्न सुरक्षा रणनीति बनाएर काम गरेको प्रहरीले जनाएको छ ।

पत्रकार सम्मेलनमा विगतमा पर्वहरुको अवसरमा जघन्य प्रकृतिका घटनाहरु कम घटेको तर केही सामान्य घटना र दुर्घटनाहरु भएको भन्दै यसपटक कुनै किसिमका अवान्छनित गतिविधि हुन नदिन प्रहरी सक्रिय रहेको भनाई छ ।’

अन्य समय भन्दा अहिले २० प्रतिशत सुरक्षाकर्मि बृद्धी गरीएको रुपन्देही प्रहरी प्रवक्ता डीएसपी श्यामु अर्यालले बताए । अर्यालका अनुसार चाडपर्वका लागि जिल्ला भरि नेपाल प्रहरी १२ सय ४८ जना परिचालन छन् ।
सुरक्षा योजनामा के के छ ?
–नियमित–आकस्मिक तथा आवश्यकता अनुसार विभिन्न ठाउँमा प्रहरी चेकिङको व्यवस्था गर्ने ।
–जनचेतनामूलक अडियो–भिडियो बनाइ माइकिङ गर्ने, पर्चा–पम्पलेट वितरण गर्ने ।
–सीमा क्षेत्रमा कडा चेकजाँच गर्ने ।
–पैदल, साइकल, मोटरसाइकल र गाडीद्वारा गस्ती गर्ने ।
–पटका, आतिसबाजीको प्रयोग गर्न नदिने र गर्नेलाई पक्राउ गरी कारबाही गर्ने ।
–जबरजस्ती चन्दा उठाउने कार्य, जुवाजन्य खेलहरु खेल्ने लगायतका कार्य हुन नदिने ।
–देउसीभैलो खेल्ने क्रममा विवाद, झगडा हुन सक्ने हुँदा सोको सुरक्षा व्यवस्था मिलाउने र देउसीभैलो खेल्ने समय राति १० बजेसम्म निर्धारण गरिएको ।
–आर्थिक कारोबार बढी हुने सुनचाँदी पसलहरु, बैंक तथा वित्तीय संस्थामाथि सुरक्षा निगरानी बृद्धि गर्ने ।
–स्वदेश फर्कने नेपालीहरुमाथि सीमा नाकामा हुनसक्ने हैरानी, लुटपाटलाई मध्येनजर राखी सुरक्षा सतर्कता बढाउने र नेपाल फर्कन सहजीकरण गर्ने ।
–आवश्यकता अनुसार मुख्य राजमार्गमा रातको समयमा गस्ती र चेकिङ गर्ने ।
–सार्वजनिक यातायातका सवारीसाधनहरुले स्पष्ट यात्रुसूचि तथा भाडादर भएनभएको चेकजाँच गर्ने ।
–यात्रुहरुका समस्याहरुलाई समाधान र सहजीकरण गर्न जिल्लाको बेलहिया, भैरहवा र बुटवल बसपार्कमा यात्रु सहायता कक्ष स्थापना गरिएको –बजार अनुगमन गरी कालोबजारी हु्न र कृत्रिम अभाव हुन नदिने ।
–विभिन्न मठमन्दिर, पुजाअर्चना गर्ने स्थान, दुर्गाको मूर्तिहरु ल्याउने र विसर्जन गर्ने समस्यामा सुरक्षा व्यवस्था मिलाउने ।
–छठ पुजाअर्चना गर्ने मन्दिर, नदी तथा खोलाहरुमा सुरक्षा व्यवस्था मिलाउने ।
–जिल्ला प्रशासन कार्यालय, अन्य सुरक्षा निकायहरु, स्थानीय तहहरु, यातायात व्यवसायीहरु सम्बन्धित सरोकारवाला निकायहरुसँग समन्वय गर्ने ।
–सीमा क्षेत्रमा हुने लुटपाट, चोरी–डकैती लगायतका घटनाहरु हुन नदिन नेपाल प्रहरी, सशस्त्र प्रहरी बल, भारतीय प्रहरी, एसएसबी, संचारकर्मी, उद्योगी–व्यवसायी, स्थानीय, भारतीय व्यापार मण्डलसमेतसँग समन्वय गरी सुरक्षा प्रबन्ध चुस्त बनाउने ।
–चाडपर्वका लागि जिल्ला भरि नेपाल प्रहरी १२४८ जनाको संख्यामा परिचालन गर्ने ।