अंकल कम्बलले अव न्यानो हुन्छ

श्रीन्यूज ओके रिपोर्टर                                                                                                                                                                      भैरहवा ।

  
शुक्रवार रुपन्देहीको मौसम चिसो थियो । बिहानै देखि घाम देखिएको थिएन। दिउसो पनि सुर्य र बादल बिच लुकामारी खेल भैरहेको थियो । शहर र गाउँ तिर बाटो छेउमा घर अघि आगो बालेर बसेका धेरै भेटिए । भैरहवाबाट जति उत्तर लागियो दिउसो चिसो त्यति कम हुन्छ र भैरहवाको तुलनामा घाम पनि लाग्छ ।                                                                
उमेरले पाका भैरहवाका तिन युवा दुश्यन्त थापा मगर, प्रेम राज शर्मा र राजकुमार गुप्ता शुक्रबार दिउसो त्यस्तै अढाई तिन बजे तिर कौशी डाउनटाउन परिसरमा बसेर कफि पिउदै गर्दा चिसो बढेको कुरा गरे ।
हुने खानेलाई त चिसो जति बढे पनि केही समस्या छैन, तर सडक किनारमा आश्रय बनाउदै आएका मानिसहरु को अवस्था कस्तो होला अहिले, लौन प्रेम दाई केही गरौ, राजकुमारले भने । हुन्छ म अलिकति ओढने कम्बल(ब्लान्केट) व्यबस्था गर्छु, उपलब्ध भयो भने बाडुम्ला, प्रेमले भने । तिन जनामा उमेरका हिसाबले पाका दुश्यन्तले रातको समयमा सडक छेउमा बस्नेहरु खोज्दै कम्बल ओढाउदै जाने प्रस्ताब पास भयो ।
प्रेमले १ सय बढी कम्बल व्यवस्था गरे । उनको घर(गल्लामण्डी, सुगरमिल)मा गएर कम्बल मिलाईयो ।                                                     

साझ ७ बजे झमक्कै अध्यारो भैसकेको थियो । दुश्यन्तको सेतो कारमा ३५ थान कम्बल राखेर कौशी डाउनटाउन परिसरबाट बुटवल हुईकियो कार । कार राजकुमारले हाकेका थिए । प्रेम र दुश्यन्तको साथमा सञ्चारकर्मि शारदा मल्ल पनि थिईन् । अञ्चलपुरबाट यसै सञ्चारकर्मि मनोरञ्जन शर्मा पनि कारमा चढदै बुटवल लागे । बुटवल चौराहा सम्म खासै कोही भेटिएन। गोलपार्क सम्म पुगियो । सडकमा दायाबाया त्यस्ता दुखमा परेका मानिसहरु देखिएनन । बुटवलका सञ्चारकर्मि स्वस्तिक श्रेष्ठलाई फोन गरी उद्धेश् यबारे अवगत गराउदै कुन स्थानमा त्यस्ता मानिस बढि छन भनि सोध्दा उनले भने ‘ बुटवल अहिले सडक मानव मुक्त शहर अभियानमा छ, त्यसैले भेटन गाह्रो छ भने । श्रेष्ठले भने जस्तै बुटवलमा कोही भेटिएन्। राजमार्ग चौराहामा एक जना भेटिए उन्लाई कम्बल दिएर टोलि पश्चिम तिनाउ पार हुईकियो । तर कोही देखिएन् ।                                                                                                                                                                                                            
पारी बुटवल जितगढीमा बाल आश्रम भएको थाहा भयो । गाडी आश्रमको अघि रोकियो। करिब ८ बजेको थियो । तापमान करीब ११ डिग्रीको आसपासमा थियो । आश्रमको मुलगेटमा ताला लगाईसकेको थियो । भित्र बालबालिकाहरु बसेको देखिए पछि बोलाईयो । सायद एक जना महिला कर्मचारी हुनुहुन्थ्यो । उहासंग सम्पर्क गर्दा २५ जना रहेको बताउनु भयो । सबैलाई एक एक वटा कम्बल दिईयो । ६।७ बर्षका बालबालिका पनि रहेछन् । 

                                                                                                                                                                                                                                       
एक साना बालकलाई राजकुमारले कम्बल दिदै भने ‘बाबु हेर है, च्यातिएको हुन सक्छ,’ होईन अंकल च्यातिएको भए पनि केही हुन्न, अब न्यानो हुन्छ,सुत्दा, साना बालकले भने । बालकको जवाफले सबैलाई भावुक बनायो । २५ वटा कम्वल बाढनु सामान्य काम हो, जस्ले पनि बाढन सक्छ, तर उचित समयमा उचित व्यक्तिले पायो भने त्यो सर्बोत्तम कार्य हो, प्रेमले भने । बुटवल उपमहानगर पालिका –१३ जितगढी स्थित बालकल्याण गृह आश्रममा रहेका सबै २५ बालबालिका सुत्ने बेलामा न्यानो ओढने पाउदा निकै हर्षित भएका थिए । रातको बेलामा अझ चिसो मौसममा यसरी आएर कम्बल कसैले दिएर जाला भनेर चिताएकी पनि थिईन, आश्रमकी महिला कर्मचारीले भनिन ।

चिसोमा अचानक बनेको योजना राम्रो भयो, अब बाकी कम्बल पनि यसै गरी बाढने हो, दुश्यन्तले भने । आवश्यकता भएकालाई दिने हो, उनले भने ।