मनोरञ्जन शर्मा
- भैरहवा ।
सिद्धार्थनगर नगरपालिका (भैरहवा) को दुई मुख्य चोकहरुमा ट्राफिकलाइट राखिने भएको छ । ट्राफिक लाइट स्थापनाका लागि ६० लाख रुपैयाँ बजेट विनियोजन भएको सिद्धार्थनगर नगर पालिकाकी उपद्दप्रमुख उमा काफ्लेले बताइन् ।
विहीवार सिद्धार्थनगर नगर पालिकाको नवौं नगरसभामा नगर उप–प्रमुख काफ्लेले बजेट प्रस्तुत गर्दै सवारी चापलाई मध्यनजर गर्दै नगरको मुख्य चोक बुद्धचोक र देवकोटा चोक गरी २ स्थानमा ट्राफिक लाइट जडानका लागि ६० लाख रुपैयाँ विनियोजन गरेको बताइन् ।
नगरमा यातायातको चाप बढ्दै गयो, बुद्ध जन्मस्थल लुम्बिनी जाने मुख्य मार्ग बुद्धचोक, देवकोटा चोक पनि अति व्यस्त देखियो त्यसैले ति दुई स्थानमा ट्राफिक व्यवस्थापनका लागि ट्राफिक लाइट जडान गर्ने योजना बनाई बजेटमै राखिएको उप–प्रमुख काफ्लेले जनाइन् । दुबै स्थान अति व्यस्त क्षेत्र हुन् ।
नेपाल भारतको सबैभन्दा ठूलो स्थलमार्ग समेत भएकाले भारत तर्फबाट समेत धेरै सवारी साधन आउने भएकाले सिद्धार्थ राजमार्गको बेलहिया बुटवल सडकखण्ड अन्तरगत सिद्धार्थनगर (भैरहवा) का देवकोटा चोक, बुद्ध चोक अति व्यस्त चोक रहेका छन् । सवारी चाप अति बढी र सवारी गति पनि अधिक बढी त्यस क्षेत्रमा हुने गरेकाले त्यस क्षेत्रमा सडक दुर्घटनाको जोखिम न्यूनिकरणका लागि ट्राफिक लाइट जडान गर्नु पर्ने माग पहिला देखिनै आएको थियो ।
यस अघि यसै सडकखण्ड अन्तरगत मणिग्राम चोकमा तिलोत्तमा नगरपालिकाले ट्राफिक लाइट जडान गरी सञ्चालनमा ल्याइसकेको छ । सिद्धार्थनगरका दुबै चोकमा ट्राफिक लाइट जडान कार्य बजेट कार्यान्वयन श्रावणदेखि हुने भएकाले श्रावण भित्रै आवश्यक काम सुरु गरी छिटो भन्दा छिटो जडान गरी सञ्चालनमा ल्याइने उप–प्रमुख काफलेले बताइन् ।
सिद्धार्थनगरको बजेटले ट्राफिक लाइट जडानका लागि मात्रै नभई नगर सौन्दर्यीकरण अन्तरगत मुख्य–मुख्य स्थानमा विशेष प्रकारको सडक बत्ती जडान गर्नेकार्यको लागि ५० लाख रुपैयाँ विनियोजन गरेको छ भने विभिन्न सडकहरूमा सडक बत्ती व्यवस्थापन गर्न आवश्यक विद्युत सामग्री खरीदका लागि ४० लाख रुपैयाँ विनियोजन गरिएको उप–प्रमुख काफ्लेले बताइन् ।
सिद्धार्थनगरले आगामी आर्थिक वर्ष २०७८।७९ का लागि १ अर्ब १८ करोड ७९लाख रुपैयाँ बराबरको बजेट ल्याएको छ । नगरपालिकाले बजेट परिचालनका लागि आबश्यक रकम मध्ये आन्तरिक आयका स्रोतहरूबाट रु. १९ करोड रुपैयाँ सङ्कलन हुने अनुमान गरेको छ भने बाँकी रकम सङ्घीय सरकार र प्रदेश सरकारको वित्तीय समानिकरण अनुदान, राजश्व बाँडफाँड, सशर्त अनुदान, विशेष अनुदान, समपुरक अनुदान, नगरपालिकाले राजस्व बाँडफाँड प्राप्त गर्ने रकम र अन्य रकमबाट परिचालन गर्ने जनाएको छ । उक्त रकममध्ये सामाजिक विकास तर्फ २७ प्रतिशत, पूर्वाधार विकास तर्फ ४१ प्रतिशत, कार्यालय सञ्चालन तथा प्रशासनिक र सुशासन तथा अन्तर सम्बन्धित क्षेत्र तर्फ २१ प्रतिशत र आर्थिक विकास तर्फ ८ प्रतिशत र वातावरण तथा विपद् व्यवस्थापन तर्फ ३ प्रतिशत खर्च हुने अनुमान रहेको उप–प्रमुख काफ्लेले बताइन् ।
नगरपालिकाको कुल बजेटको ४८.४४ प्रतिशत चालु तर्फ र ५१.५६ प्रतिशत पूजिगत तर्फ रहेका छन् । बजेटले सडक पूर्वाधार, पर्यटन, स्वास्थ्य, शिक्षा, कृषि लगायतका क्षेत्रलाई प्राथमिकता दिएको नगर प्रमुख हरी प्रसाद अधिकारीले बताए ।
Get real time update about this post categories directly on your device, subscribe now.
