श्रद्धापुर्वक मनाईयो रुपन्देहीमा छठ

• श्रीन्यूज ओके रिपोर्टर. भैरहवा ।

सूर्य भगवानको आराधना गरी मनाईने तराई क्षेत्रको मुख्य पर्व छठको मुख्य दिन आज अस्ताउदो सूर्यलाई अर्घ दिई धुमधामका साथ मनाईयो ।रुपन्देहीको भैरहवा, बुटवल, भैरहवा बुटवल र अन्य ग्रामिण क्षेत्रहरु मायादेवीको बेथरी, बनगाई, रोहीणीको धकधई, ओमसतिया,बेलहिया मर्चवार, लुम्बिनी,गैडहवा, सुर्यपुरा लगायतका क्षेत्रमा धुमधामका साथ छठ मनाइँयो । ति क्षेत्रमा रहेका तालतलैया, खोला किनारमा श्रद्धापुर्वक छठपूजा भएको थियो । चार दिन सम्म बिभिन्न बिधि पूरा गरी मनाईने यो पर्वको तेश्रो दिन अस्ताउँदो सूर्यलाई अर्घ र चौथो दिन उदाउँदो सूर्यलाई अर्घ दिएपछि छठ पर्व सकिन्छ ।
छठ पर्वको पहिलो दिन शुक्रवार साँझ खीर खाएर बस्ने, दोश्रो दिन शनिबार पानी समेत नपिई दिनभर निराहार ब्रत बस्ने गरिन्छ । आईतवार साँझ नयाँ तथा चोखो कपडा लगाई नाङ्गो खुट्टामा घरबाट पूजा सामग्रीका साथ छठ पोखरीमा जाने र सूर्य अस्ताउने समयमा सूर्यको आराधना गरि अर्घ दिएर पूजा गरीन्छ । आईतबार रातभर जाग्राम बसेर सोमबार बिहान उदाउँदो सूर्यलाई जल चढाउंदै पूजा गरेपछि छठ पूजा समाप्त हुन्छ ।
छठी माईको नाममा ब्रत र सूर्यको आराधना गरि तराईमा मनाईने छठ पर्व बिशेष गरी तराई क्षेत्रमा मनाउने गरिन्छ ।
भैरहवामा नेपाली सेनाको ब्यारेकमा अवस्थित छठमाई पोखरी र गल्लामण्डीमा श्रीरामजानकी हनुमान मन्दीर परीसरमा छठ पूजा पोखरीमा छठ पूजा भएको थियो ।
छठ पूजन समिति सिद्धार्थनगरको आयोजनामा सिद्धार्थनगर नगरपालिका वार्ड नंं. ५ स्थित सेनाको ब्यारेकमा रहेको पोखरीमा बिगत ६० बर्ष भन्दा लामो समय देखि निरन्तर छठ पूजा हुदै आएको छठ पुजन समारोह समितीका संयोजक आनन्द प्रसाद गुप्ताले बताए । यसपटक यो पोखरीमा २ हजार पाँच सय भन्दा बढीले बेदी अगाडी सरिक भई पूजा गरेको र यो पोखरीमा पूजाका लागी परिवार सहित १५ हजार बढी उपस्थित रहेको गुप्ताले बताए ।
बिशेष गरि तराईमा बसोबास गर्ने मधेशी समुदायले मात्र मनाउँदै आएको यस पर्वलाई पछिल्ला बर्षहरुमा पहाडी मूलका महिलाहरुसमेत पूजाका लागि आउने क्रम बढेको र यस ले एक धर्म जातीले अर्को धर्म जाती को पर्व सस्कारलाई उच्च सम्मान दिदै एकताको सन्देश दिएको छ । गल्लामण्डी स्थीत श्रीराम जानकी हनुमान मन्दिर परीसरमा यो पटक समेत गरी सातौ पटक छठपूजा हुन लागेको र यहा २ सय भन्दा बढी बेदी पूजाका लागी निर्माण भएको र हजारौ उपस्थित भई श्रद्धापूर्बक छठ पूजा गरेको श्रीराम जानकी हनुमान मन्दिर छठ पूजा समारोह समितिका अध्यक्ष नरेन्द्र रौनीयारले बताए । तराईबासी मात्र नभई पहाडी समुदायका महिलाहरु पनि पूजा गर्न र सहभागी हुन आएकाले यो एकताको साझा पर्वका रुपमा रहन गएको छठपूजन समिती गल्लामण्डीका प्रमुख सल्लाहकार भैरब कलवारले बताए । भैरहवाको दुबै स्थानमा भएको छठ पूजा कार्यक्रममा गृहमन्त्री बालकृष्ण खाँण मुख्य अतिथी रहेका थिए ।
छठका लागी भनेर रुपन्देहीमा पहिला देखिनै पूजा गरीदै आएको ताल,तलैया, खोला नालामा सरसफाई गरी सिंगार पटार गर्नुका साथै बेदीहरु निर्माण कार्य भएका थिए ।
दशै तिहार जस्तै तराईवासीका लागि छठ पर्वले विशेष महत्व राख्ने गर्छ । छठ माता र सूर्यको पूजा गर्नाले सुख, शान्ति, समृद्धि, दीर्घायु साथै छालाको रोग हट्ने धार्मिक मान्यता रहेको छ ।
छठमा गहँुको पिठोबाट बनाइएको ठेकुवा, पुडी, लड्डु, कसार, पञ्चमेर, विभिन्न किसिमका गेडागुडी, जटा नरिवल, कागती, अदुवा, उखु, केरा लगायतका सामग्रीहरु प्रसादको रुपमा अर्पण गर्ने चलन रहेको छ ।