जिल्ला प्रशासन कार्यालय रुपन्देहीमा सेवाग्राहीका लागि टाइम कार्ड

• श्रीन्यूज ओकेरिपोर्टर
  भैरहवा ।

  ---

जिल्ला प्रशासन कार्यालय रुपन्देहीले सेवाग्राहीको सुबिधाका लागि विहीवारदेखि टाइम कार्ड सुरु गरेको छ । सर्वसाधारणलाई जिल्ला प्रशासन कार्यालयद्वारा सम्पादन गरिने सेवामा सहजता होस् भन्दै टाइम कार्ड सुरु गरिएको रुपन्देहीका प्रमुख जिल्ला अधिकारी भरतमणि पाण्डेले बताए । अहिलेलाई कार्यालयबाट सम्पादन हुने ४ सेवाहरु नयाँ नागरिकता, नागरिकता प्रतिलिपि, राष्ट्रिय परिचयपत्र तथा राहदानीका लागि टाइम कार्ड सुरु गरिएको प्रमुख जिल्ला अधिकारी पाण्डेले जनाए ।

कार्यालयमा सेवा लिन आउने सेवाग्राहीलाई समय नै तोकेर सेवा दिने र तोकेकै समय भित्र सेवाग्राहीलाई सेवा दिने गरी टाइम कार्ड सुरु भएको प्रजिअ पाण्डेले जनाए । यस अघि पनि बडापत्रमा लेखिए अनुसार सोही दिन नै सेवा दिई रहेका थियौं, तर सेवा ग्राहीले कति बेला काम सम्पन्न हुन्छ भन्ने अन्यौलता भइरहने र दिनभरी जसो कार्यालयमा बसिरहनु पर्ने हुन्थ्यो । तर अब टाइम कार्ड सुरु भए पछि सबै प्रकृया पु¥याई आएका कागजातहरुलाई निश्चित समयनै तोकेर बोलाइने हुँदा सेवाग्राहीलाई सहज हुने प्रजिअ पाण्डेको भनाई छ ।

अब जिल्ला प्रशासन कार्यालयमा सेवा लिन आउने सेवाग्राहीले सबै प्रकृया पु¥याई आएका कागजातहरु बुझाएपछि एउटा कार्ड पाउनेछन् जुन कार्डमा सेवा उपलब्ध हुने कोठा र बोलाइने समय हुन्छ, सोहि कार्डको आधारमा सेवाग्राहि सेवा लिन कार्यालय पुगे हुन्छ । जिल्ला प्रशासन कार्यालय रुपन्देहीका सूचना अधिकारी तथा सहायक प्रमुख जिल्ला अधिकारी रामचन्द्र अर्यालका अनुसार नयाँ नागरिकताको हकमासबै प्रकृया पु¥याएर १२ बजे भित्र पेश भएका निवेदकहरुलाई १ बजे भित्र र दिउँसो १२ बजेदेखि ३ बजेसम्म पेश हुन आएका निवेदकहरुलाई ४ बजे भित्र नागरिकता प्रदान गरिने बताए ।

नागरिकता प्रतिलिपिको हकमा प्रमाण पु¥याएर पेश भएका निवेदकहरुलाई अभिलेख भिडेको १ घण्टा भित्र प्रतिलिपि दिइने छ । यस्तै अनलाइन फारम भरेर राष्ट्रिय परिचय पत्रका लागि आएका निवेदकले पनि १ घण्टा भित्रै सेवा पाउने अर्यालले दावी गरे । ई–पासपोर्टको लागि आउने सेवाग्राहीहरु प्रि–इनरोलमेन्टको फारम भरेर आएकाहरुको तोकिएको दिन र समयमै इनरोलमेन्ट हुने र केन्द्रबाट प्राप्त भएका ई–पासपोर्टहरु टोकन प्रणाली अनुसार सोही दिन समय तोकेर वितरण हुने अर्यालले बताए ।

सेवाग्राहीको लागि टाइमकार्ड सुरु गरे पनि गर्भवती महिला, अपाङ्गता भएका व्यक्ति र ज्येष्ठ नागरिकलाई भने यो टाईम कार्ड नचाहिने कार्यालयले जनाएको छ । यस्ता सेवाग्राहीहरुको हकमा सोझै फाँटमा तोकिएको कर्मचारीलाई भेटेर सेवा लिन सकिने बताइएको छ ।

जिल्ला प्रशासन कार्यालयमा रुपन्देहीमा दैनिक १ सय बढी नयाँ नागरिकता, ८० बढी प्रतिलिपि, २ सय जना भन्दा बढीको राष्ट्रिय परिचय पत्र बन्ने गरेको छ । त्यस्तै २ सय ५० बढी ई–पासपोर्टको आबेदन बुझिने र सोहि आधारमा फोटो खिच्ने र बायोमेट्रिकको कार्य हुने तथा दैनिक सरदर २५० नै राहदानी बितरण हुने गरेको छ ।