कायस्थको नेतृत्वमा रुपन्देही आर्टिष्ट संघ

• श्रीन्यूज ओके रिपोर्टर
  भैरहवा ।

  ---

नेपाल कमर्शियल आर्टिस्ट संघ रूपन्देहीको प्रथम भेलाले उज्ज्वलकुमार दे कायस्थको अध्यक्षतामा रूपन्देही जिल्ला कमर्शियल आर्टिष्ट संघ गठन गरेको छ । शनिवार भैरहवामा भएको भेलाले कायस्थको अध्यक्षतामा समिति गठन गरेको हो । जस अनुसार संघको उपाध्यक्षमा अशोक कुमाल, सचिवमा मनोहर थापा, सह–सचिवमा धनु घिमिरे (रवि), कोषाध्यक्षमा बिशन गुरुङ र सह–कोषाध्यक्षमा गणेश घिमिरे चयन भएका छन् । त्यस्तै सदस्यहरुमा विष्णु प्रसाद सुवेदी, दिनेश मणि कोहार, राजेश कोहार, धनराज धवल, हुकुम बहादुर बलामी, सन्तोष कुमार चौधरी, आकाश चौधरी (कुलदिप), गुलाब चौधरी र सुग्रिम हरिजन रहेका छन् । संघको बरिष्ट सल्लाहकारमा शंकरप्रसाद शर्मा, तथा सल्लाहकारहरुमा रामदास हरिजन र मन गोल्डी रहेका छन् ।

रूपन्देही जिल्लामा व्यवसायिक रुपमा आर्ट सम्बन्धी काम गर्ने करिब ३०० जना रहेका छन् । सबैलाई संस्थामा आवद्ध गराई व्यवसायिक हकहितका लागि एक भई अघि बढ्ने मुख्य काम रहेको नव अध्यक्ष उज्जवकुमार दे कायस्थले बताए ।

यस अघि भेलाको उद्घाटन गर्दै नेपाल कमर्शियल आर्टिस्ट संघका केन्द्रीय अध्यक्ष चन्द्र प्रसाद राजवंशीले आर्टिष्टहरुलाई राज्यले उपेक्षित गरेको भन्दै कला व्यवसायीहरुले हकहीत, पहिचान, संरक्षण र सम्मानका लागि एकताबद्ध हुन जरुरी रहेको बताए । कलाकारले कला अनुसारको मुल्य नपाएको, राज्यको हेर्ने दृष्टिकोण र पहिचानलाई संकुचित गर्दै गरेकोले रोजगारी खोसिने अवस्था आएको तथा दर्ता भएर कर तिरे पनि राज्यको अंगहरुमा हाम्रो पहिचान नहुनु र राज्यले सम्मान गर्न नसक्नु दुखद कुरा रहेको भन्दै व्यवसायलाई मर्यादित बनाउँदै व्यवसायिक सामाजिक सुरक्षाको माग गरेका छन् ।

संघका केन्द्रीय अध्यक्ष चन्द्र प्रसाद राजवंसीले २०५१ सालदेखि हामी संस्थागत भए पनि सरकारकै उपेक्षाका कारण हाम्रो पहिचान र पेशा संकटमा पर्दै गएकोले संस्थालाई पुनः जिवित गरेर देश व्यापी रुपमा संगठन विस्तारको अभियान चलाइएको बताए । हामी अहिले मेचीदेखि महाकालीसम्म अभियान मार्फत जिल्ला कमिटी गठन गर्दै गएका छांै, कला व्यवसायीहरुको साझा संस्थाको रुपमा २८ जिल्लामा समिति गठन भएको उनले भने । कला र क्षमता भए पनि राज्यबाट उपेक्षित भएकोले नयाँ पिठीलाई यो पेशा तर्फ आकर्षित गर्न, कलाकार श्रमजीवी हो भन्ने गर्वको वातावरण बनाउन र सबै कलाकारहरु एकताबद्ध भई संगठित हुन यो अभियान चलाइएको उनले भने ।

भेलामा केन्द्रीय महासचिव चित्र बहादुर कार्की, सचिव सुवास केसी, केशव लामा, कमलराज श्रेष्ठ, विष्णु प्रसाद सुवेदी, अशोक कुमाल, उज्जवल कुमार देकायस्थ रामदास हरिजन लगायतले कलासँग सम्बन्धित व्यवसायी स्वरोजगार कलाकारहरूको पेशागत हकहितको रक्षाका लागि अग्रसर भएको बताए ।

नेपालमा एक लाख बढि पेशागत आर्टिष्ट क्रियाशिल रहेको र संघले एकताबद्ध गर्ने काम सुरु गरेको छ । रुपन्देहीमा मात्रै ३ सय बढि कला व्यवसायीहरु रहेका छन् । यस संघ अन्तर्गत पेन्टिङ, बोर्ड, ब्यानर लेख्ने, डिजाइन गर्ने, थान्का पेन्टिङ, मिथिला आर्ट, ग्लो साईनबोडर्, मूर्तिकला, चित्रकला, रबर–सेल्फ छाप, फ्लेक्स प्रिन्ट, मेटल इचिङ, मार्वल इचिङ (शिलालेख), डिजिटल बोर्ड, मेटल लेटर वक्र्स, स्टेज, स्टल डेकोरेशन ललितकला, ग्लास इचिङ, वाल पेन्टिङ, होर्डिङ बोर्ड, चित्राङ्कन, कार्टुन चित्र, छपाई सम्बन्धी कार्य गर्ने श्रमिक, टू–डी/ थ्री–डी बोर्ड, सिल्क आर्ट, काष्ठकला र हस्तकलालगायत व्यवसायीहरू छन् ।