ब्राउन सुगर सहित चार जना नियन्त्रणमा

• श्रीन्यूज ओके रिपोर्टर, भैरहवा ।
  

  ---

इलाका प्रहरी कार्यालय सालझण्डीको प्रहरी टोलीले लागु ओषध खैरो हेरोइन (ब्राउन सुगर) सहित दुई जनालाई पक्राउ गरेको छ । गत २७ गते शुक्रवार दिउँसोको समयमा महेन्द्र राजमार्ग हुँदै कपिलवस्तु जिल्ला तर्फबाट लागु औषध खैरो हेरोइन ओसारपसार हँुदैछ भन्ने विशेष सूचनाका आधारमा प्रहरीको टोलीले सैनामैना नगरपालिका वडा न. १० फायरलाइनमा चेकजाँच गर्दा सो हेरोइन सहित दुई जना पक्राउ परेका हुन् ।

कपिलवस्तुबाट रुपन्देही तर्फ लु ४० प ८८०३ नम्बरको मोटरसाइकलमा आएका जिल्ला रुपन्देही सैनामैना नगरपालिका वडा न. ११ बस्ने वर्ष २३ को नविन सेन र सोही ठाउँ बस्ने वर्ष २४ को नारायण शाहीको साथबाट एक ग्राम २०० मिलिग्राम लागु औषध बरामद भएको रुपन्देही प्रहरी प्रवक्ता एवम् प्रहरी नायब उपरीक्षक श्यामु अर्यालले बताए । त्यसै गरी सैनामैना नगरपालिका वडा न. ८ रामापुर स्थितमा कपिलवस्तुबाट आउँदै गरेका सैनामैना नगरपालिका वडा नं. ७ बस्ने वर्ष ३१ को प्रतिप गौतम र सोही ठाउँ बस्ने वर्ष २८ को सन्दीप गौतमलाई खानतलासी गर्दा निजहरुको साथबाट चार ग्राम ८०० मिलिग्राम लागु औषध खैरो हेरोईन बरामद गरिएको अर्यालले जनाए । चारै जनालाई सम्मानित अदालतबाट म्याद थप गरी आवश्यक अनुसन्धान अघि बढाएको प्रहरीले जनाएको छ ।