श्रीन्यूज ओके रिपोर्टर । भेरहवा
युक्रेनको विमान पार्किङ गर्न भैरहवामा ल्याइएको छ । अन्तर्राष्ट्रिय उडान अवतरण गर्ने विमानहरुको ल्याण्डिङ र पार्किङका लागि भैरहवास्थित गौतमबुद्ध अन्तर्राष्ट्रिय विमानस्थलमा शुल्क छुट भएपछि काठमाडौंमा स्थान अभाव भएमा भैरहवामा पार्किङका लागि आउन थालेका छन् ।
काठमाडौंमा चार्टर उडानका रुपमा आउने र फिर्ता जान केही दिन लाग्ने भए भैरहवामा निःशुल्क ल्याण्डिङ र पार्किङ सुविधाका लागि आउने गरेका हुन् । काठमाडौंमा ल्यान्डिङ र पार्किङको विमानको तौलको आधारमा प्रतिघण्टाको दरले रकम भुक्तानी गर्नुपर्ने हुन्छ ।
विगत चार दिनदेखि युक्रेनको एक निजी वायुसेवा कम्पनीको विमान भैरहवास्थित गौतमबुद्ध अन्तर्राष्ट्रिय विमानस्थलमा पार्किङ गरी राखिएको छ। युक्रेनको स्काई अप एयरलाइन्सको एअरबस विगत चार दिनदेखि विमानस्थल परिसरमा पार्किङमा रहेको छ । सो विमान मे १९ मा गौतमबुद्ध अन्तर्राष्ट्रिय विमानस्थलमा अवतरण गरेको र मे २६ मा दिन फिर्ता जाने विमानस्थलका सूचना अधिकारी विनोद राउतले जानकारी दिए ।
त्रिभुवन अन्तर्राष्ट्रिय विमानस्थल काठमाडौंमा आए पश्चात भैरहवा पार्किङका लागि ल्याइएको हो, यहाँको विमानस्थलमा कुनै पनि अन्तर्राष्ट्रिय उडान गर्ने विमानले उडान अवतरण गरे या पार्किङमा राखे कुनै शुल्क नलाग्ने, राउतले बताए । मंगलबार बिहान नेपाल एयरलाइन्सको विमान मलेसियाबाट भैरहवामा अवतरण गर्दा पहिलो पटक २ एयरबस एकै पटक विमानस्थलमा देखिएका थिए ।
स्काई अपका १४९ सिट क्षमताका २ र १८९ सिट क्षमताका ८ गरी १० वटा ७३७ सिरिजका एयरबस छन् । चार्टरमा नेपालमा पनि आइरहने स्काई अप जुन २०१७ मा युक्रेनमा स्थापना भएको निजी विमान सेवा कम्पनी हो।
कति उडान कति यात्रु
गौतमबुद्ध विमानस्थलमा विगत २ वर्षमा २४० वटा अन्तर्राष्ट्रिय उडान भएको छ। यी उडानबाट १६ हजार बढी यात्रु भैरहवा ओर्लंदा २० हजार बढी भैरहवाबाट उडेका छन् । विमानस्थल उद्घाटन लगत्तै केही महिना कुवेतको जजिरा एयरवेजले नियमित र केही समय पछि हिमालयन एयरलाइन्सले भैरहवा मलेसिया चार्टर उडान गरेकोमा अहिले नेपाल वायुसेवाको मलेसिया भैरहवा काठमाडौं एकतर्फी साप्ताहिक उडानमात्र भइरहेको छ।
Get real time update about this post categories directly on your device, subscribe now.
