२०औ लिस्नुकप फुटबल, फर्साटिकर क्लब सेमिफाइनलमा

• मनोरञ्जन शर्मा
  भैरहवा ।

साविक विजेता फर्साटिकर युथ क्लब रुपन्देहीको कोटीहवामा जारी २०औं लिस्नु कप फुटबल प्रतियोगिताको सेमिफाइनलमा प्रवेश गरेको छ । आइतवार कोटीहवा स्थित पशुपति माविको मैदानमा सम्पन्न पहिलो क्वाटरफाइनलमा गोर्खा व्वाइज स्पोर्टस क्लब बुटवललाई ३–० गोलले पराजित गर्दै फर्साटिकर क्लब सेमिफाइनलमा स्थान सुरक्षित गरेको हो ।

फर्साटिकरको जितमा खेल सुरु भएको १९औं मिनेटमा विवेक पुनले पहिलो गोल गर्दै १–० ले अग्रता दिलाएका थिए । ३०औं मिनेटमा बलराम न्यौपानेले गोल गरी २–० को अग्रता बनाउन सफल भए । मध्यान्तरसम्म २ गोलले पछि परेको गोर्खा ब्वाइजले ३ वटा राम्रा अवसर पाएको थियो खेलमा फर्कन । तर मौका चुकायो । मध्यान्तर पछि ६४ मिनेटमा फर्साटिकरका निजाम अलिले गोल गर्र्दै ३–० को अग्रता पुरयाए । जितसंगै साविक विजेता फर्साटिकर युथ क्लबले सेमिफाइनलमा स्थान सुरक्षित गरेको छ ।

खेलमा फर्साटिकरका बिष्णु लामा म्यान अफ द म्याच घोषित हुँदै ३ हजार रुपैयाँ पुरस्कार प्राप्त गरे । लामालाई तिलोत्तमा १६ का समाजसेवी एवं क्लबका शुभेच्छुक पुरुषोत्तम सुवेदीले पुरस्कार दिए । त्यसै गरी सोहि क्लबका बलराम न्यौपाने माइडिया म्यान अफ द मुभमेन्टबाट पुरस्कृत भए । प्रतियोगितामा रुपन्देही, नवलपरासी, कपिलवस्तु, पाल्पा र स्याङ्गजाका गरी १६ टिमको सहभागिता रहेको छ भने विजेताले ३ लाख रुपैयाँ र ट्रफी तथा उपविजेताले १ लाख ५० हजार रुपैयाँ र ट्रफी प्राप्त गर्ने छन् । त्यस्तै गरी सेमिफाइनलमा पराजित हुने २ टिमले जनही २५ हजार रुपैयाँ, प्रतियोगिताको सर्वोत्कृष्ट खेलाडीले २५ हजार रुपैयाँ तथा उत्कृष्ट गोलरक्षक, उदयमान खेलाडी र सर्वाधिक गोलकर्ताले जनही ७ हजार रुपैयाँ तथा प्रत्येक दिनको म्यान अफ द म्याचले ३ हजार रुपैयाँ पुरस्कार प्राप्त गर्ने क्लबका अध्यक्ष तिर्थ राज मल्लले बताए ।

प्रतियोगितामा यस पटक सोहि स्थानकी श्रीमाया गुरुङ्गले आफ्ना बुवा स्व. डिम बहादुर गुरुङ्गको स्मृतिमा मुख्य प्रायोजकको रुपमा सहयोग गरेको क्लबले जनाएको छ । सोमबार दोश्रो क्वाटर फाइनल खेलमा फोर ब्रदर्श एफ.सी. नवलपरासी तथा राईजिङ्ग स्टार युवा क्लब शिवराज नगरपालिका कपिलवस्तु बिच हुने आयोजक लिस्नु युवा क्लब का सचिव मनोज क्षेत्रीले बताए ।