विश्वकप फुटबल आजदेखि कतारमा सुरु हुँदै

• श्रीन्यूज ओके रिपोर्टर, भैरहवा

विश्वकप फुटबल प्रतियोगिताको २२ औं संस्करण आजदेखि कतारमा सुरु हुँदैछ । विश्वको सबैभन्दा लोकप्रिय खेल फुटबलको सबैभन्दा ठूलाे प्रतियोगिताको २२औं संस्करणमा विश्वका ३२ राष्ट्र बिच प्रतिष्पर्धा हुँदैछ । १ महिनासम्म कुल ६४ खेल हुनेछ । 
कतारमा आज विश्वकप फुटबल सुरु भएसंगै सम्पूर्ण विश्वको ध्यान अब कतार तर्फ केन्द्रित हुँदैछ । विश्वकप फुटबल एशियामा आयोजना हुन लागेको दोश्रो पटक हो । यस अघि सन् २००२ मा जापान र दक्षिण कोरियाले संयुक्त रूपमा विश्वकप आयोजना गरेको थियो ।

कतारमा हुने विश्वकपमा ३२ राष्ट्र सहभागी हुने यो अन्तिम विश्वकप समेत हो । यस पछि सन् २०२६ मा अमेरिका, क्यानाडा र मेक्सिकोमा संयुक्त रूपमा आयोजना हुने विश्वकपको अर्को संस्करणमा ४८ राष्ट्रको सहभागिता रहने छ ।
कतारमा हुने प्रतियोगितामा ३२ राष्ट्रलाई आठ समूहमा राखीएको छ ।सन् २०१८ को विश्वकप विजेता फ्रान्स प्रतियोगितामा सहभागी हुनेछ तर युरोपियन च्याम्पियन इटली विश्वकपमा छनौट हुन असफल रहेको छ।

प्रतिस्पर्धाका लागि ३२ टोली छानिएका छन्। लीग खेल प्रत्येक समूहका चारचार टोलीबीच हुनेछ। विश्वकपमा सहभागी हुने ३२ राष्ट्रमा युरोपका १३ देश छन्। चार पटक विश्व विजेता जर्मनी, दुई पटक विश्व विजेता फ्रान्स, एक पटक विश्व विजेता स्पेन र इङ्ग्ल्यान्डसहित डेनमार्क, बेल्जियम, क्रोएशिया, सर्बिया, नेदरल्यान्ड्स, स्विट्जरल्यान्ड, पोर्चुगल, पोल्यान्ड र वेल्स कतारमा खेल्नेछन्।
एशियाबाट छ देश विश्वकप खेल्नका लागि छनोट भएका छन् जसमा जापान, अस्ट्रेलिया, दक्षिण कोरिया, इरान, साउदी अरब र कतार छन्।
अफ्रिकाबाट घाना, सेनिगल, ट्यूनिशिया, मोरक्को र क्यामरून सहभागी छन्। त्यस्तै दक्षिण र उत्तर अमेरिकाबाट समान चार टोलीले कतारमा हुने विश्वकप खेल्ने छन्। दक्षिण अमेरिकाबाट हालसम्म सबैभन्दा बढी पटक विश्वकप उचालेको ब्रजिल, दुई पटकको विश्व विजेता आर्जेन्टिना र युरुग्वे अनि इक्वेडर प्रतिष्पर्धामा उत्रिदै छन्। उत्तर अमेरिकाबाट भने क्यानडा, मेक्सिको, अमेरिका र कोस्टारिका छन्।

आजको पहिलो उदघाटन खेल
२२औं संस्करणको बिश्वकप फुटबल प्रतियोगिताको उदघाटन खेल आयोजक कतार र इक्वेडर बिच नेपाली समय अनुसार राती ९बजेर ४५ मिनेटमा सुरु हुदैछ ।
राती ८ बजेर ३० मिनेटमा प्रतियोगिताको उदघाटन हुनेछ । त्यसपश्चात पहिलो खेल हुनेछ । उदघाटन समारोह र खेल अल बेत रंगशालामा हुनेछ । यो रंगशालामा दर्शक क्षमता ६० हजार जना रहेको छ । दोहाबाट ४० किमि टाढा उत्तरमा यो रंगशाला रहेको छ ।
अहिलेसम्म क–कसले चुमे विश्वकप?
ब्रजिलः पाँच पटक (सन् १९५८, १९६२, १९७०, १९९४, २००२)
जर्मनीः चार पटक (सन् १९५४, १९७४, १९९०, २०१४)
इटलीः चार पटक (सन् १९३४, १९३८, १९८२, २००६)
आर्जेन्टिनाः दुई पटक (सन् १९७८, १९८६)
फ्रान्सः दुई पटक (सन् १९९८, २०१८)
उरुग्वेः दुई पटक (सन् १९३०, १९५०)
स्पेनः एक पटक (सन् २०१०)
इङ्गल्यान्डः एक पटक (सन् १९६६)
सबैभन्दा धेरै फाइनल खेल्ने राष्ट्र जर्मनी हो जसले आठ पटक फाइनल खेलेको छ भने ब्रजिलले सात पटक फाइनल खेलेको छ।
इटलीले छ पटक र आर्जेन्टिनाले पाँच पटक फाइनल खेलेका छन्।
फाइनलमा पुगे पनि विश्व विजेता बन्न असफल देशहरू नेदरल्यान्ड्स (तीन पटक), चेकोस्लोभाकिया र हङ्गेरी (दुई/दुई पटक) र स्वीडन र क्रोयशिया (एक–एक पटक) रहेका छन्।