एनकेएफआइ अन्तर्राट्रिय कराते तथा किकबक्सिङ च्याम्पियनशिप २०२२ मा नेपालले भाग लिने

• श्रीन्यूज ओके रिपोर्टर,भैरहवा

भारतको पुनेमा हुने एनकेएफआइ अन्तर्राट्रिय कराते तथा किकबक्सिङ च्याम्पियनशिप २०२२ मा नेपालले पनि सहभागिता जनाउने भएको छ ।सो अन्तर्राष्ट्रिय प्रतियोगितामा जापान गोजुरियो कराते डो मिसन संघ, नेपालका खेलाडीले सहभागिता जनाउने आज भैरहवामा पत्रकार सम्मेलन गरी जानकारी गराइएको छ ।

मिसन संघका प्रमुख प्रशिक्षक एवं संस्थापक अध्यक्ष के.बि. रानाको नेतृत्वमा १५ सदस्यीय टोली (११ खेलाडी) त्यस तर्फ पौष ८ गते प्रस्थान गर्ने संघका केन्द्रीय उपाध्यक्ष सतिश चौधरीले बताए । प्रतियोगितामा काता र कुमिते तर्फ विपिन राना ५० केजि तौल समूह, निलम श्रीश (५५केजि), सरोज थापा (६०केजि), सन्तु चौधरी (६५ केजि), नेहा श्रीस (४० केजि), सोनिया बिश्वकर्मा (४५ केजि), आकृति राना (५० केजि), रिमा कुमाल (५० माथि), गोविन्द कुवर क्षेत्री (६० केजि) तौल समूहबाट तथा सिद्धार्थ राना (२५केजि) जुनियर तहमा प्रतिष्पर्धा गर्ने अध्यक्ष केबि रानाले बताए । प्रतियोगितामा प्रशिक्षक र व्यवस्थापक ४ जना समेत सहभागी हुनेछन् ।

प्रतियोगितामा नेपाल सहित, भारत श्रीलंका, बंगलादेश र भुटान गरी ५ देशको सहभागिता रहनेछ। जापान गोजुरियो कराते डो मिसन संघ नेपालले यस अघि सन् २०१४ पुनामा, २०१७ दिल्लीमा, २०२० कलकत्तामा, २०२१ पटनामा आयोजना भएको अन्तर्राष्ट्रिय प्रतियोगितामा टिम च्याम्पियन बनिसकेको छ । मिसन संघको नेपालका बिभिन्न जिल्लामा ३० डोजो रहेका छन् ।

संस्थापक अध्यक्ष के.बि. रानाको सभापतित्वमा भएको पत्रकार सम्मेलनमा सचिव गिरी पुनले स्वागत मन्तब्य राखेका थिए । संस्थाका प्रमुख सल्लाहकार भरत बहादुर केसी, लुम्बिनी प्रेस क्लबका अध्यक्ष नरेश केसी, मिसन संघका रुपन्देही अध्यक्ष उमेश थापा मगर लगायतले प्रतियोगिताको बारेमा आफ्नो धारणा राखेका थिए ।

गत कार्तिकमा मिसन संघका अन्तर्राष्ट्रिय संस्थापक अध्यक्षको उपस्थितिमा तालिम एवं प्रशिक्षण कार्यक्रम समेत रुपन्देहीमा भएकाले खेलाडीबाट उत्कृष्ट प्रदर्शनको अपेक्षा गरीएको नेपालका अध्यक्ष रानाले बताए ।