टाईगर रिसोर्टमा आज बक्सिङ्गः नेपाल र भारतका बक्सर भिड्दै

• श्रीन्यूज ओके रिपोर्टर
  भैरहवा ।

नेपाल र भारतका व्यवसायिक बक्सर बिच आज साझ टाइगर प्यालेस रिसोर्ट भैरहवा (कोटीहवा)मा बक्सिङ्ग खेल आयोजना हुँदैछ । युनाइटेड प्रोफेसनल बक्सिङ्ग भारतको आयोजनामा हुने खेलमा ३ जना नेपाली र ११ भारतीय गरी १४ बक्सर भिड्दैछन् । युनाइटेड प्रोफेसनल बक्सिङ्गले आयोजना गर्न लागेको यो नेपालमा पहिलो पटक हो । यस अघि भारतका बिभिन्न शहरमा नवौं पटक यो बक्सिङ्ग आयोजना भइसकेको र नेपालमा पहिलो पटक भैरहवा क्षेत्रमा आयोजना हुन गइरहेको आयोजकले बताएका छन् ।

बक्सिङ्गमा नेपाली बक्सरहरु लक्ष्मणराई, शुलभ माली र मनोज तामाङ्गले फ्लाइवेट, फिदरवेट र सुपर मिडिलवेट समूहमा भारतस्य बक्सरहरु क्रमशः शुभम् चौहान, विनय बर्मा र कुलदिप सिंहसंग लडनेछन् । जम्मा ७ बाउटमा अन्य बाँकी ४ बाउटहरुमा भारतीय बक्सरहरु सुपर फेदरवेटमा उमेश चवन र बरुण परत्याल, वेल्टरवेटमा राहुल सिंह र सुरेश पासाम, अभिषेककुमार र सुमित कुमार तथा आरभ राठी र गौरभ बिच मुकाबला हुने आयोजक संस्था युनाइटेड प्रोफेसनल बक्सिङ्गका संस्थापक अनिल मान रोयले बताए । दुई देशका व्यवसायिक बक्सरहरु बिच प्रतिष्पर्धा हुने भएकाले यस क्षेत्रका खेल प्रेमीहरुलाई नौलो आयाम हुने रायले बताए । ‘‘व्यवसायिक खेलाडीहरुलाई एउटा प्लेटफर्म पनि भएको छ उनिहरुले अवसर पाएका छन्, बक्सिङ्ग खेलको प्रवद्र्धन र लगाव बढनेछ ।’’ उनले बताए ।

युनाइटेड प्रोफेसनल बक्सिङ्गका रणनीतिक सल्लाहकार एवं खेल बजार विज्ञ आदित्य ओबेरायले नेपालमा पहिलो पटक भैरहवा क्षेत्रमा हुन लागेको यो खेलले गर्दा यहाँको पर्यटन विकासमा थप टेवा पुग्ने बताए । ‘‘यो अवसर नपाएकाहरुलाई प्लेटफर्म पनि हो, भारतीय बक्सरहरुको नेपाली खेलाडीसंगको खेलहेर्न भारतको बिभिन्न स्थानबाट बक्सिङ्ग प्रेमीहरु पनि आउछन् ।’’ ओबेरायले भने । ‘‘लुम्बिनी विश्वमै चर्चित छ यहाँ अन्तर्राष्ट्रिय विमानस्थल पनि छ, भविष्यमा यस्ता कार्यक्रमहरु निरन्तर भए भारत लगायत अन्य देशका पर्यटकहरु सिधै यहाँ आउछन्, खेलका माध्यमबाट पनि पर्यटन क्षेत्रको विकासमा सघाउँ हुन्छ ।’’ ओबेरायले भने ।

टाइगर प्यालेस रिसोर्टको पुल साइडमा प्रतियोगिताको लागि रिङ्ग निर्माण भएको छ । ३ सय बढी दर्शक आउने अपेक्षा आयोजकको छ । साँझ ४ बजेदेखि प्रतियोगिता आयोजना हुँदैछ । टाइगर प्यालेस रिसोर्टकी कन्ट्री हेड एमी बनेलले खेलका माध्यमबाट पर्यटन क्षेत्रमा सहयोग पुग्ने, रिसोर्टको प्रचार एवं प्रवद्र्धन पनि हुने भएकाले रिसोर्ट खेल स्थल उपलब्ध गराई भेन्यु पार्टनरकारूपमा सहयोग गरेको बताइन् । ‘‘खेलका माध्यमबाट पर्यटन क्षेत्रको विकासमा सघाउँन सबैको सहयोग आवश्यक रहेको बनेलको भनाई छ, यस्ता प्रतियोगिता र अन्य इभेन्टहरु हामी निरन्तर गर्नेछांै ।’’ बनेलले भनिन् ।

बक्सिंगखेलका बारेमा आयोजकले शुक्रबार पत्रकार सम्मेलन गरी जानकारी गराएको थियो । खेलमा नेपाल प्रोफेशनल बक्सिङ्ग कमिशनको पनि सहकार्य छ ।