रुपन्देही सुपरलिग क्रिकेटको उपाधि तिरुपति स्पोर्टसलाई

श्रीन्यूजओके रिपोर्टर । भैरहवा

तिरुपति स्पोर्टस क्लव रुपन्देही सुपरलिग एक दिवसीय क्रिकेट प्रतियोगिताको उपाधि जितेको छ । तिरुपतिले यो सहित सुपरलिगको उपाधि सातौ पटक जित्न सफल भएको छ ।

बुधबार भैरहवास्थित सिद्धार्थ क्रिकेट मैदानमा सम्पन्न फाइनल खेलमा लुम्बिनी खुकुरी क्लबलाई २० रनले पराजित गर्दै तिरुपतिले उपाधि सँगै१ लाख १ रुपैयाँ पाएको छ । उपविजेतामा चित्त बुझाएको लुम्बिनी खुकुरीले ५० हजार १ रुपैयाँसहित ट्रफी, मेडल र प्रमाणपत्र प्राप्त गरेको छ ।
टस जितेर ब्याटिङ गरेको तिरुपतिले निर्धारित ५० ओभरको खेलमा ४३ ओभर खेल्दै सबै विकेट गुमाएर १ सय ७६ रनको सामान्य योगफल बनाएको थियो । १२ पटक भन्दा बढी पटक रुपन्देही सुपरलिगको बिजेता खुकुरीले उक्त सामान्य योगफल भेट्टाउन सकेन् ।

तिरुपतिको जितमा तुलबहादुर थापाले ४३, आनन्द गौडले ३९, एजाजुल हक हुसेनले ३२, सन्तोष साउदले १२, कमल विकले ११ र संदीप मौर्यले १० रनको योगदान दिए । बलिङमा लुम्बिनी खुकुरीका सन्तोष यादवले ४, शाहब आलमले ३, दुर्गेश गुप्ताले २ र सन्देश जिसीले १ विकेट लिए ।
१ सय ७७ रनको लक्ष्य पछ्याएको लुम्बिनी खुकुरी ४२ ओभर ४ बलमा सबै विकेट गुमाउँदै १ सय ५६ रनमा समेटियो र उपाधिबाट चुक्यो । लुम्बिनी खुकुरीलाई सस्तैमा रोक्न बलिङमा तिरुपतिका संदीप मौर्यले १० ओभरमा १ मेर्डन राख्दै ३४ रन खर्चेर महत्वपूर्ण ५ विकेट लिए । यस्तै, वसिर अहम्मदले ३ तथा रोहित थापाले १ विकेट हात पारे ।

लुम्बिनी खुकुरीका लागि प्रज्वल थापाले ३६, दुर्गेश गुप्ताले अविजित २७, शाहब आलमले १७, सन्तोष यादवले १५ र धनबहादुर शाहीले ११ रन बनाए । खेलमा तिरुपतिका संदीप मौर्य म्यान अफ द फाइनलबाट पुरस्कृत भए ।

प्रतियोगितामा तिरुपतिका संदीप मौर्य म्यान अफ द सिरीज, तिलोत्तमा क्रिकेट क्लबका आशुतोष पाण्डे उदयीमान खेलाडी, न्यु होराइजनका अमर मिश्रा बेष्ट ब्याटर र लुम्बिनी खुकुरीका अजयकुमार चौहान बेष्ट बलर घोषित हुदै चारैजनाले जनही ५ हजारका दरले पुरस्कार प्राप्त गरे । प्रतियोगिताको बिजेता पुरस्कार एभरेष्ट कत्था मिल ले तथा उप बिजेता पुरस्कार रुपन्देही क्रिकेट संघका सस्थापक अध्यक्ष प्रेम कुमार सेन्चुरीले सौजन्य गरेका थिए ।

रुपन्देहीका पुर्ब क्रिकेटरहरु अमृत भटराई र बसन्त रेग्मी एवम ई–ड्राइभ नेपालका अध्यक्ष राजेश मास्केले पनि उत्कृष्ट खेलाडी एवं बिजेता टिमलाई नगद राशी प्रदान गरेका थिए ।

रुपन्देही क्रिकेट संघको आयोजना तथा ड्रिम युनिक कन्सलटेन्सी प्रालि, बुटवलको मुख्य प्रायोजनामा आयोजित प्रतियोगिता एक महिनासम्म चलेको थियो । विजेता र उपविजेता टिमलाई सिद्धार्थनगर नगरपालिका उपप्रमुख उमा अधिकारी, आयोजक क्रिकेट संघका अध्यक्ष हरिबहादुर थापा, संघका संस्थापक अध्यक्ष प्रेमकुमार सेन्चुरी, पूर्वअध्यक्ष प्रशान्त विक्रम मल्ल, एभरेष्ट कत्था मिलका सञ्चालक बसन्त रोक्का लगायतले पुरस्कार प्रदान गरे ।