भारतीय ट्रकको चामल लुटेर चालककै हत्या ४ जना पक्राउ

• भैरहवा ।
  

  ---

खाद्यान्न लुटपाट गरी युवकको हत्या गरेको घटनामा संग्लन चार आरोपीहरुलाई रुपन्देही प्रहरीले पक्राउ गरी सार्वजनिक गरेको छ । पक्राउ पर्नेमा रुपन्देही सिद्धार्थनगर नगरपालिका ६ का ३० वर्षीय अलि भन्ने सद्दाम कुजडा, सोही स्थानका २७ वर्षीय समिर भन्ने रिजवान अली मुसलमान, २८ वर्षीय महेश कहाँर, तनहुँ शुक्लागण्डी १० का २७ वर्षीय सुनिल पौडेल रहेका छन् ।

गत साउन २० गते भारत महाराजगंज जिल्लाका तौफिक अहमद पठानको सिद्धार्थनगर १३ डण्डाखोलामा शव फेला परेको थियो । प्रहरीका अनुसार सोही दिन पठानका आफन्तले सम्पर्कमा नरहेकोले खोजतलासका लागि जिल्ला प्रहरी कार्यालयमा निवेदन दिएका थिए । संयोगले शव फेला पर्नु र पठान हराएको हुँदा खोजतलास गर्न निवेदन जिल्ला प्रहरीमा एकै दिन परेको थियो । पठानको खोजतलासका लागि निबेदन पर्नु भन्दा केही घण्टा अगाडी डण्डा खोलामा शव फेला परेको थियो । परिवारका अनुसार उनि साउन १७ गतेबाट नै सम्पर्कमा थिएनन् । भारतीय नागरिक सम्पर्क विहिन भएको भन्दै प्रहरीमा खोजतलासको सूचना पछि प्रहरीले कतै डण्डामा फेला परेको शव पठानको त होइन भन्ने शंका लागि अनुसन्धान अघि बढाउँदा उनकै शव भएको पुष्टी भएको जिल्ला प्रहरी कार्यालय रुपन्देहीका प्रमुख तथा प्रहरी उपरीक्षक मनोज कुमार केसीले बताए ।

घटनाको प्रकृति हेर्दा हत्या गरिएको देखिएपछि प्रहरीले अनुसन्धान थालेको थियो । मृतक पठान भारतीय गाडी चालक थिए । साउन १७ गते पठानले गाडीमा भारतबाट ल्याएको चामल लुटपाट गरी हत्या गर्ने योजना आरोपीहरुले बनाएको प्रारम्भिक अनुसन्धानमा देखिएको एसपी केसीले बताए । प्रहरीका अनुसार गाडीमा करिब १८ लाख रुपैयाँ बराबरको चामल थियो ।

पठानको योजनवद्ध तरिकाले हत्या भएको खुलेको छ । पठानले चामल लिएर काठमाडांैका सप्लायर्सका पुर्‍यउने गरी आएका थिए । तर उनलाई सो चामल भैरहवाकै एजेन्ट सद्दामलाई पैसा लिएर दिन काठमाडाैंका सप्लायर्स नन्दन नाम गरेका व्यक्तिले उनलाई अह्राएको अनुसन्धानमा खुलेको रुपन्देही प्रहरी प्रवक्ता प्रहरी नायव उपरीक्षक सत्यनारायण थापाले बताए ।

नन्दन र सद्दामको फोनमा अरु कुनै व्यक्ति मार्फत सम्पर्क भएको बताइएको छ । सद्दामकै नेतृत्वमा गाडी लाई भैरहवा भन्सारबाट प्रकृया पुरा गरी अनलोड गर्ने भन्दै अघि ल्याएको र भैरहवा नआउँदै बाटोमा सबै मिलेर मदिरा सेवन गरेको समेत उनुसन्धानमा खुलेको प्रहरीले पत्रकार सम्मेलनमा जानकारी दिएको छ ।

योजना अनुसारसंगै बसेर मदिरा सेवन पछि ट्रक अनलोड गर्न भन्दै सद्दाम सहित रिजवान र महेश ले मिलेर हत्या गरेको खुलेको प्रहरीको भनाई छ । चालकको हत्या पछि शवलाई डण्डा खोलामा फालेर चामल सहितको ट्रकलाई परासीको भुमही पुर्‍याएका थिए । ट्रक चलाउने काम महेशले गरेको प्रहरीको भनाई छ ।

प्रहरीका अनुसार चामल सहित गाडीलाई भुमहीमा लगेर अर्को गाडीमा चामल पल्टी गरी उक्त गाडीलाई आरोपी महेशले भारतको सनौली बजार एसबिआई बैंकको अगाडी सडक छेउमा पार्किङ गरी छाडेर आएका थिए । लुटपाट गरिएको उक्त चामल पक्राउ परेका तनहुँका पौडेलसँग मिलेर बिक्री गर्ने योजना उनिहरुको थियो । गोपी ब्रान्डमा रहेको चामललाई तत्कालै बजारमा लगेर बिक्री गर्दा थाहा हुन सक्ने भएकाले अर्कै ब्रान्ड नामका चितवनमा बोरा समेत तयार गरिसकेका थिए । पक्राउ परेका चार जनालाई कर्तव्य ज्यान मुद्दाम अदालतबाट म्याद थप गरी अनुसन्धान भइरहेको जिल्ला प्रहरी कार्यालय रुपन्देहीले जनाएको छ ।